Ashtu si në të kaluarën, edhe sot CIA po luan një rol aktiv në Amerikën Latine, duke mbështetur Pentagonin në operacionet kundër Venezuelës dhe karteleve të drogës.
Sipas raportimeve të fundit, këto veprime janë ndërmarrë me urdhër të drejtpërdrejtë të Donald Trump, ndërsa disa dokumente të rrjedhura në media kanë zbuluar detaje të planit.
The Guardian shkruan se inteligjenca amerikane ka qenë e përfshirë në fazën e parë të sulmeve që çuan në shkatërrimin e disa anijeve të dyshuara për kontrabandë, duke dhënë ndihmë në katër fronte kryesore:
-Foto satelitore dhe informacione mbi objektivat e mundshëm
-Përgjim dhe punë në terren për mbledhjen e të dhënave mbi trafikantët
-Gjurmimi i motoskafeve dhe gjysmë-nëndetëseve
-Misione të mundshme brenda elitës politike dhe ushtarake të Caracas-it
Sipas gazetës, përfshirja e CIA-s ka qenë e menjëhershme dhe e gjerë, për të intensifikuar ofensivën kundër kundërshtarëve. Ndërkohë Associated Press ka zbuluar një plan që daton nga viti 2024 dhe është riaktivizuar së fundmi: rekrutimi i pilotit të Nicolás Maduro-s, Bitner Villareal. Amerikanët do ta kishin kontaktuar për ta bindur të devijonte avionin me presidentin në bord drejt një vendi ku SHBA-të mund ta arrestonin. Manovra do të shpërblehej bujarisht, por Villareal nuk pranoi të bashkëpunonte.
Më pas, autoritetet e Caracas-it akuzuan shërbimet amerikane për përgatitjen e një provokimi: një njësi e Marinës amerikane, Gravely, do të goditej nga një shpërthim gjatë një ndalese në Trinidad dhe Tobago, një atentat që do t’i atribuohej Venezuelës për të justifikuar një kundërpërgjigje.
Nga arkivat ka dalë edhe historia e një sulmi kibernetik nga CIA në fund të mandatit të parë të Trump-it: hakerët kishin në shënjestër sistemet e sigurisë së Venezuelës. Një skenar që mund të përsëritet në disa nivele paralelisht me sulme të mundshme të flotës amerikane në ujërat e Karaibeve.
Janë përmendur iniciativa për të nxitur grusht shteti, rebelime në ushtri dhe përçarje në shoqëri. Disa ide janë pjesë e luftës propagandistike, të tjera janë objektiva konkrete.
Ka pasur edhe dyshime nga kongresmenë amerikanë mbi identifikimin e varkave të fundosura, tashmë 15 që nga fillimi i ofensivës. Pas një seance të mbyllur, një deputete demokrate deklaroi se nuk ka gjithmonë siguri mbi atë që është fundosur. Kjo tezë u hodh poshtë nga Sekretari i Mbrojtjes Pete Hegseth, i cili ndërkohë ka vendosur rregulla të rrepta për vartësit: ndalohet të flitet për këtë krizë, si për të tjerat, pa leje paraprake.
Në sfond rikthehet e kaluara, me aktivitetet sekrete në Amerikën Latine gjatë viteve ’60–’70: nga Operacioni Condor në mbështetje të ushtarakëve të ekstremit të djathtë, te rrëzimi i Salvador Allende në Kili. Historia është e mbushur me fakte, suksese dhe dështime për SHBA-të: katastrofa në Gjirin e Derrave, zbarkimi në Santo Domingo, pushtimi i Grenadës, rrëzimi i Noriega-s dhe lidhjet me Irangate.
Por mbi të gjitha, seria e pafund e intrigave për eliminimin e Fidel Castro-s: u menduan helmime, sabotime të çuditshme, “kontrata” për vrasje me përfshirjen e mafies. Rrugë të ndërlikuara që, herë pas here, janë ndërthurur me hetimet për atentatin ndaj John Kennedy-t. Ana e errët e luftës politike, parajsa e hijeve.