Komisioni Rregullator ka miratuar masat organizative për zhvillimin e zgjedhjeve të pjesshme për kryetar bashkie në pesë bashki, konkretisht Berat, Tepelenë, Cërrik, Mat dhe Vlorë, në zbatim të Dekretit të Presidentit të 1 tetorit.
Sipas vendimit, partitë politike duhet të paraqesin kërkesën për t’u regjistruar si subjekte zgjedhore pranë KQZ-së jo më vonë se data 16 tetor 2025. Në të njëjtën datë skadon edhe afati për regjistrimin e komiteteve nismëtare për kandidatët e pavarur. Kujtojmë se deri më tani, Partia Socialiste, “Shqipëria Bëhet” dhe Lëvizja për Zhvillim Kombëtar kanë dorëzuar në KQZ, kërkesën për regjistrim në Komisionin Qendror të Zgjedhjeve për zgjedhjet e pjesshme të 9 nëntorit.
Koalicionet zgjedhore duhet të regjistrohen pranë KQZ-së jo më vonë se data 21 tetor, ndërsa dokumentet e kandidimit dorëzohen në KQZ për bashkitë Vlorë dhe Berat, dhe në KZAZ për Tepelenë, Cërrik dhe Mat, jo më vonë se data 24 tetor 2025.
Nga 25 tetori deri më 9 nëntor 2025, të gjitha institucionet vendore dhe qendrore që planifikojnë aktivitete me karakter publik në këto bashki duhet të raportojnë paraprakisht pranë Komisionit Qendror të Zgjedhjeve (KQZ). Fushata zgjedhore do të nisë zyrtarisht më 1 nëntor 2025.
Ndërkohë, Autoriteti i Mediave Audiovizive do të monitorojë OSHMA-të për transmetimet që lidhen me aktivitetet publike gjatë kësaj periudhe.
KQZ dhe KZAZ-të përkatëse do të ndjekin një kalendar të ngjeshur afatesh për regjistrimin e partive, kandidatëve, koalicioneve dhe përfaqësuesve në komisionet e administrimit zgjedhor. Afati për dorëzimin e dokumenteve të kandidimit përfundon më 24 tetor, ndërsa akreditimi i vëzhguesve vendas dhe të huaj duhet të kryhet përpara datës 7 nëntor.
Gjithashtu, në tre ditët e fundit para votimeve të 9 nëntorit, përfshirë ditën e zgjedhjeve, ndalohet publikimi i sondazheve zgjedhore.
Vendimi hyn në fuqi menjëherë dhe mund të ankimohet në Kolegjin Zgjedhor brenda pesë ditëve nga shpallja.
