Të varfrit përjashtohen. Inxhinierët e teknologjisë së lartë do të kenë hyrje të kufizuar. Ndërsa për të pasurit, dyert do të jenë të hapura, madje pa pritur në radhë. Presidenti i Shteteve të Bashkuara, Donald Trump, ka prezantuar një version të ri të të shumëpërfolurës “kartë e artë”, një leje e shpejtë hyrjeje që kushton një milion dollarë dhe u lejon të huajve të pasur të jetojnë dhe të punojnë në SHBA.
Trump nuk e ka bërë të qartë nëse kjo kartë e artë do të zëvendësojë vizën aktuale EB-5, e cila u jepet investitorëve dhe që prej kohësh përdoret nga të pasurit si rrugë e shpejtë për të hyrë në vend, përmes një investimi prej 800 mijë dollarësh.
Ekspertët ligjorë dhe avokatët e çështjeve të emigracionit thonë se presidenti nuk ka të drejtë të krijojë një lloj të ri vize pa miratimin e Kongresit. Për më tepër, kjo nismë mund të sjellë padi ligjore nga ata që ndihen se po anashkalohen në proceset ekzistuese.
Administrata amerikane ka kaluar disa muaj duke përgatitur terrenin për kartën e artë, duke hapur që në qershor një listë pritjeje për ata që janë të interesuar të aplikojnë. Sekretari i Tregtisë, Howard Lutnick, i cili ka udhëhequr nisjen e këtij programi dhe ishte i pranishëm në Zyrën Ovale gjatë prezantimit, e ka përshkruar këtë program vizash si një mënyrë për të sjellë më shumë investime dhe të ardhura për shtetin. Sipas tij, kjo formë e re emigracioni mund të sjellë deri në 100 miliardë dollarë, një shumë që Trump ka thënë se mund të përdoret për të ulur taksat dhe për të pakësuar borxhin publik.
“Prej tani e tutje,” ka deklaruar Trump “do të pranojmë vetëm njerëz të jashtëzakonshëm në nivelet më të larta, jo ata që vijnë për të marrë vendet e punës të amerikanëve.”
Ky njoftim është pjesë e një serie vendimesh të ndërmarra nga administrata për të shtuar të ardhurat e shtetit. Që nga fillimi i mandatit, Trump ka mbledhur miliarda dollarë përmes tarifave të reja doganore, të cilat i paguajnë kompanitë që operojnë në SHBA, ka marrë pjesë në aksionet e kompanisë Intel, ka kërkuar 15% të fitimeve të Nvidia nga shitjet e çipave në Kinë dhe ka sugjeruar që shteti duhet të marrë një pjesë të fitimeve që dalin nga patentat universitare.
Së shpejti mund të vijë edhe një vizë tjetër e re, e quajtur “Trump Platinum Card”, e cila sipas faqes zyrtare të qeverisë do të kushtojë 5 milionë dollarë dhe do t’u lejojë mbajtësve të saj të qëndrojnë deri në 270 ditë në SHBA pa u taksuar për të ardhurat që fitojnë jashtë vendit. Trump nuk foli për këtë kartë gjatë prezantimit. Megjithatë, ai shpalli një tarifë të re prej 100 mijë dollarësh për vizat H-1B, të cilat u jepen punonjësve të huaj me aftësi të larta, sidomos në fushën e teknologjisë. India është vendi që përfiton më shumë nga kjo vizë, e ndjekur nga Kina. Kjo tarifë do të rëndojë mbi kompanitë, por Trump tha se kompanitë e mëdha të teknologjisë “do të jenë shumë të kënaqura”. Karta e artë vjen në një kohë kur qeveria amerikane ka ashpërsuar masat ndaj emigrantëve të tjerë, veçanërisht ata të paligjshëm dhe ata që hyjnë me programe të veçanta si Statusi i Mbrojtjes së Përkohshme apo lejet humanitare.
