Prokuroria e Posaçme kundër Korrupsionit dhe Krimit të Organizuar në Tiranë ka dorëzuar para Gjykatës së Posaçme të Shkallës së Parë konkluzionet përfundimtare për Dritan Lleshin ose Dritan Ndrecën, i akuzuar për “Ushtrim të ndikimit të paligjshëm ndaj personave që ushtrojnë funksione publike”.
Sipas Prokurorisë, Lleshi i ka premtuar bashkëshortes së një punonjësi në një pikë karburanti punësimin e djalit të tyre si inspektor mjedisi, kundrejt pagesës prej 400 mijë lekësh.
Ai ka thënë se do të përdorte lidhjet e tij në Ministrinë e Brendshme për ta ndihmuar djalin që të fitonte konkursin për këtë punë. Prokuroria ka kërkuar një vit burg për Lleshin, që konvertohet me gjykim të shkurtuar në tetë muaj në qeli.
“I pandehuri i ka thënë se kishte një vëlla në Tiranë, me emrin P.N, i cili punonte në Ministrinë e Brendshme dhe përmes tij do të ndërhynte që djali i kallëzuesit të fitonte konkursin për inspektor mjedisi në Fier ose Lushnjë. Sipas planit të prezantuar prej të pandehurit Dritan Lleshi, kjo do të realizohej në muajin qershor të 2019, kohë kur A.N i ka dorëzuar edhe një kapar prej 200.000 lekësh Dritan Lleshit, i cili më pas e shtyu mundësinë për punësim në shtator të të njëjtit vit. Nga analiza e provave dhe të dhënave të grumbulluara në kuadër të hetimit të këtij procedimi penal, rezulton e provuar se i pandehuri Dritan Lleshi, me lidhje familjare me P.N (djali i xhaxhait), ka kryer veprën penale “Ushtrim i ndikimit të paligjsHëm ndaj personave që ushtrojnë funksione publike”, parashikuar nga neni 245/1 paragrafi 2 i Kodit Penal“, thuhet në njoftimin e SPAK.