Policia e Tiranës ka marrë një telefonatë këtë të premte për një bombë në parkimin e hotel “Plazës”, në qendër të kryeqytetit.
Autoritetet dyshojnë se alarmi është fals, por megjithatë kanë marrë masa paraprake.
Siç duket nga pamjet, efektivë të policisë kanë rrethuar zonën. Ndërkohë janë evakuuar klientët dhe stafi i hotelit, të cilët qëndrojnë përtej perimetrit të sigurisë.
“Rreth orës 19:35, në Sallën Operative të DVP Tiranë ka telefonuar një punonjëse e stafit të një hoteli në rrugën “Abdi Toptani”, me pretendimin se dikush i panjohur e ka njoftuar për vendosjen e një sasie eksplozivi në parkimin e këtij hoteli. Menjeherë në vendngjarje ka shkuar forca të shumta policie të cilët kanë bërë rrethimin e zonës dhe evakuimin e personave të hotelit”, njoftoi policia.
Disa prej tyre janë kapur edhe në befasi, siç është rasti i këtij qytetari që ka dalë me rrobëdëshambër.
Siç ka mësuar gazetari Besar Bajraktaraj, telefonata anonime ka mbërritur në recepsionin e hotelit.
Në hotel ndodhen aktualisht edhe efektivë të forcave RENEA që po kryejnë kontrolle.
“Gjithashtu janë njoftuar forca xheniere për kontrollin dhe verifikimin e informacionit”, njoftuan uniformat blu, të cilat i kanë nisur verifikimet për këtë rast.
Autoritetet dyshojnë se alarmi është i rremë pasi mendojnë se mund të ketë telefonuar ndonjë klient që ka humbur shuma parash pasi ka luajtur në ambientet e kazinosë që ndodhet në këtë hotel.
Megjithatë ky është ende një dyshim pasi deri më tani nuk dihet ekzaktësisht nëse në vendngjarje ka lëndë plasëse apo jo.
Kujtojmë se më herët, në ambientet e një shkolle private në kryeqytet dhe pranë ambasadës së Ukrainës në Tiranë patën njoftime për bombë nëpërmjet adresave elektronike, të cilat rezultuan të rreme të dyja.