Ukraina aktualisht nuk ka forca të mjaftueshme për të rimarrë Donbasin dhe Krimenë me mjete ushtarake, ndaj mbështetet në diplomaci. Kështu është shprehur presidenti ukrainas, Volodymyr Zelensky në një intervistë për “Le Parisien”, raportuar nga Rbc Ukraina.
“Këto territore tani janë të kontrolluara nga rusët. Ne nuk kemi forcë për t’i rimarrë. Mund të llogarisim vetëm në presionin diplomatik të komunitetit ndërkombëtar për të detyruar Putinin të ulet në tryezën e bisedimeve,” tha lideri ukrainas.
“Edhe pas vitesh lufte kur menduam se rusët nuk mund të ishin më cinikë, ne shohim diçka edhe më keq. Rusia jo vetëm dërgon trupa të Koresë së Veriut për të sulmuar pozicionet ukrainase, por gjithashtu përpiqet të fshehë humbjet duke djegur fytyrat e ushtarëve koreano-veriorë të vrarë në betejë. Kjo çmenduri duhet të marrë fund!” shkroi në X presidenti Zelensky, duke postuar një video që tregon trupat e Koresë së Veriut të vrarë në front.
Ndërkohë forcat ruse po bombardojnë me dronë njerëz që përpiqen të arratisen nga zonat më të rrezikuara të rajonit ukrainas të Khersonit, shkruan në Telegram kreu i administratës ushtarake rajonale, Roman Mrochko, siç raporton Ukrinform.
“Pushtuesit rusë po përpiqen të pengojnë në mënyrë tinëzare përpjekjet e evakuimit nga zonat e rrezikshme në komunitetin tonë,” thotë Mrochko. Oficeri shpjegon se rusët po vendosin të ashtuquajturat kurthe të ‘iriqit’ në rrugët e pajisura me ‘ferra’ çeliku për të shpuar rrotat e automjeteve që ikin. Por rreziku kryesor nuk është dëmtimi i gomave nga këto kurthe, shton ai, sepse kur makinat ndalojnë për të ndërruar gomat, ato bombardohen nga dronët.
“Në ditët e fundit, dy automjete, njëra e Administratës Ushtarake të qytetit të Khersonit dhe tjetra e drejtuar nga vullnetarë, goditën kurthe, të ashtuquajturat ‘iriqët’, të cilat terroristët rusë i shpërndanë në rrugë gjatë përpjekjeve për të evakuuar njerëzit nga. qyteti Antonivka”, thuhet në mesazh.
Ushtria e Koresë së Veriut ka humbur “disa qindra” ushtarë (të vdekur dhe të plagosur) në rajonin rus Kursk që kur dërgoi mijëra trupa në vend në tetor, raporton CNN, duke cituar një zyrtar të lartë amerikan.
Sipas Ukrainës, të paktën 30 ushtarë të Koresë së Veriut u vranë ose u plagosën në luftimet e fundjavës pranë fshatrave të Kursk, pranë kufirit me Ukrainën. Një njësi ukrainase raportoi se koreano-veriorët – të cilët mbanin uniforma të ndryshme nga ato të rusëve – filluan sulmet e këmbësorisë duke përdorur “të njëjtat taktika si 70 vjet më parë”.
Ushtarët e Phenianit nuk kanë përvojë në fushën e betejës dhe do të përballen me terrene të panjohura në një teatër modern dhe brutal të luftës, komentoi burimi, duke shtuar se humbjet e pësuar tashmë përfshijnë “të gjitha gradat”, duke përfshirë drejtuesit e komandës dhe kontrollit.