Pas stuhisë që goditi Romën të martën e kaluar, një valë e keqe e motit goditi veriun e Italisë duke shkaktuar dëme të mëdha dhe probleme në trafik.
Në orët e para të mëngjesit një stuhi e fortë goditi Milanon, ku pati disa përmbytje dhe ndërprerje të qarkullimit. Disa zona të gjykatës së Milanos janë përmbytur me hyrjen kryesore në Corso di Porta Vittoria të mbyllur. Në katin e tretë të pallatit po punohet për kufizimin e dëmeve të shkaktuara nga reshjet e shiut që hyjnë nga çatia.
Nuk ka shqetësim për nivelet në Lambro dhe Seveso, por stuhitë do të vazhdojnë gjatë gjithë ditës së sotme, ndoshta me intensitet më të madh”, ka deklaruar në një postim në Facebook, këshilltari bashkiak për sigurinë, Marco Granelli.
Situata në Piemonte është më delikate. Për momentin shqetësim është lumi Stura di Lanzo, i cili ka tejkaluar nivelin e rrezikut në Mezzenile, ndërsa në Lanzo ka kaluar nivelin e paralajmërimit. Në nivelin e rrezikut ka arritur edhe përroi i Anzës në San Carlo, në zonën e Verbanos.
Reshje të dendura shiu goditën luginat e zonës së Torinos, ku në disa zona ranë deri në 169 milimetra shi në dymbëdhjetë orët e fundit, Chisone në San Martino, Pellice në Luserna, San Giovanni dhe Villafranca, Sangone në Trana janë afër nivelit të rrezikut. Në fshatin Giordani dhe fshatin Combe, në zonën Bussoleno dhe Mattie, Rio Gerardo u tejmbush dhe 50 persona mbetën të izoluar për shkak të shembjes së dy urave. Një burrë është zhdukur pasi u përfshi në traktorin e tij nga uji që dilte nga përroi Orco në Feletto, në zonën e Torinos.
Shi i dendur ra gjithashtu edhe në Valle d’Aosta. Rruga rajonale për në Cogne, e vetmja rrugë hyrëse në qytet, u mbyll në Lexert, së bashku me rrugët komunale për në Valnontey dhe Lillaz. Në drejtim të Cretaz disa banorë raportuan përmbytje. Priten ende reshje shiu në të gjithë territorin, në alarm të verdhë, me vëmendje të veçantë në luginat Gran Paradiso ku alarmi hidrogjeologjik shkon në ngjyrë portokalli.
Në Liguria reshjet po zbuten në mënyrë progresive, por alarmi portokalli mbetet në fuqi deri në orën 13:00 të së enjtes me reshjet që lëvizin drejt qendrës së Rajonit. Mbrojtja Civile e Rajonit ka raportuar rihapjen e autostradës A10 dhe rivendosjen e trafikut hekurudhor midis Finale Ligure dhe Loano.
Probleme ka pasur edhe në zonën e Savonës për shkak të përmbytjes së disa rrugëve ujore, ndërsa në zonën Imperia një rrëshqitje dheu ka shkaktuar probleme në A10 dhe në pjesën hekurudhore që të çon në kufirin me Francën.
Shoqëria Italiane e Mjekësisë Mjedisore raportoi se në vetëm tre vjet Italia është goditur nga 878 ngjarje ekstreme të motit, duke përfshirë 310 në 2022, 378 në 2023 (rritje 22 për qind në një vit) dhe 190 që nga fillimi i 2024. Lombardia, Emilia Romagna, Piemonte dhe Veneto janë rajonet më të prekura.