Operacioni “Metamorfoza” ka qenë temë diskutimi në emisionin “3D” nga Alban Dudushi në RTSH. Analisti Poli Hoxha tha se në këtë operacion ka të përfshirë emra nga policia dhe politika, por që sipas tij, ata janë ende në pozicione dhe nuk i kanë dalë emrat akoma.
“Hetimit vazhdojnë, vazhdon kryqëzimi i fakteve. Ka emra sidomos nga policia dhe politika që nuk janë shfaqur pasi i gjithë ky operacion është fokusuar në kapjen e kokave e këtyre organizatave. Besoj se do dëgjojmë shumë. Është hapur kutia e Pandorës, për mua është vetëm histori sepse sa vjen dhe po i afrohet simbiozës së krimit të organizuar me politikën. SPAK tashmë është përfshirë.
Sot ne e quajmë krim të organizuar, dje kanë qenë ata të fortët e zonave, por do dalin dhe do shpalosen. Duket thënë që është politika që i ka ftuar këta dhe pastaj kanë vijuar rrugën bashkë. Kokat e vërteta të krimit në Shqipëri janë me xhaketa dhe ende nuk kanë dalë”, tha Hoxha.
Zbërthimi i dosjes “Metamorfoza 2”, një nga aksionet më të mëdha të SPAK që nisi mëngjesin e 17 majit të 2024-ës çoi çmontimin e 7 bandave kriminale dhe zbardhjen e 21 ngjarjeve te ndodhura për hesap të tyre.
/a.r