Gjyqtarja e Gjykatës së Shkallës së Parë në Tiranë, Arnisa Këlliçi, ka marrë një letër kërcënimi me jetë, për të dhe familjen e saj, gjë që e nxitur atë të kërkojë mbrojtje të posaçme nga KLGJ.
Ka qenë vetë gjyqtarja ajo e cila ka bërë më dije këtë ngjarje, në një letër drejtuar Këshillit të Lartë Gjyqësor.
Për këtë çështje ka folur sot në Breaking në Top News, gazetarja Anila Hoxha. Gazetarja ka dhënë detaje në lidhje me disa nga pistat ku po hetohet nga Policia e Shtetit.
“Deri në orët e vona të fundjavës policia ka këqyrur edhe kamerat e sigurisë me shpresën se do të gjente një person që ka shkruar letrën me dorë të kërcënimit të gjyqtares. Policia ka vendosur mbrojtje të parakohshme.
Në Gjykatën e Tiranës çdo person që hyn kontrollohet. Aty ka një detektor që kontrollon, ka dy oficerë policie dhe një punonjës civil. Pra nuk është e vështirë të identifikohen personat që kanë hyrë dhe aq më tepër që korridoret kanë kamera”, tha Anila Hoxha.
Për sa i përket pistave aj u shpreh se “nuk besoj se ka të bëjë me ndonjë çështje konkrete, sepse Gjykata e Tiranës nuk shqyrton çështje të forta dhe shumë të njohura, nuk shqyrton çështje që kanë rrezikshmëri për jetën. Të paktën gjykatësja nuk ka një çështje të tillë. Letra do të çohet për akt-ekspertizë daktilografike në Policinë e Shteti duke shpresuar se mund të identifikohet autori.
Hapi tjetër do të jetë marrja e një dëshmie të kancelarit si dhe gjyqtarja do të thërritet sërish për pyetje. Por ka dyshime që mund të jetë jo vetëm për shkak të detyrës, por edhe një konflikti që ka ndodhur në gjykatën penale të qytetit.
Pak ditë më parë gjyqtarja është përfshirë në një shaka mes kolegeve (kjo nuk është pistë kryesore), të cilëve u ka thënë se ka të dhëna se dikush nga ata është përgjuar (Në formë e shakasë). Pas shakasë ka pasur reagime të ashpra mes tyre. Konflikti ka perceptuar dhe pas kësaj shakaje ka pasur një situatë të ngrirë mes kolegeve”, tha gazetarja.
/f.s
