Nga salmonela te droga/ “AMG Food”, pronare e kontejnerit me mish pule ku u gjetën 41 kg kokainë!

Hetimet e Policisë dhe Prokurorisë pritet të përcaktojnë personat përgjegjës për trafikimin, si dhe nëse porositësit e ngarkesës apo persona të tjerë të përfshirë në zinxhirin e transportit kishin dijeni për drogën.

Gjithashtu hetimet pritet të zbardhin itinerarin e plotë të kontejnerit, mënyrën se si është futur droga në të dhe personat që qëndrojnë pas ngarkesës së kokainës.

Emri i “AMG Food” ishte përmendur edhe në një tjetër çështje në mars të vitit 2025, këtë herë të lidhur me sigurinë ushqimore.

Më 11 mars 2025, në Portin e Durrësit u kontrollua një ngarkesë prej 18.3 tonësh mish pule e importuar nga Brazili, për të cilën analizat e Institutit të Sigurisë Ushqimore dhe Veterinare (ISUV) konfirmuan praninë e bakterit Salmonella. Sipas të dhënave të bëra publike për rastin, vetëm rreth 5.2 tonë u bllokuan, ndërsa pretendohet se rreth 13.1 tonë të tjerë kishin dalë në treg. Ngarkesa lidhej me kompaninë AMG FOOD (diMal sh.p.k.), ndërsa rasti ngriti pikëpyetje mbi kontrollet dhe mënyrën e administrimit të produkteve pas rezultateve të analizave.Çështja mori vëmendje edhe për faktin se AMG FOOD kishte qenë përfituese e mbështetjes nga programi IPARD, në kuadër të investimeve për sektorin e përpunimit të mishit dhe rritjen e standardeve të sigurisë ushqimore. Pas publikimit të rastit, hetimet u përqendruan te përgjegjësitë për importimin dhe shpërndarjen e ngarkesës dhe te mënyra se si një pjesë e mishit dyshohet se përfundoi në treg pavarësisht kontaminimit të konstatuar.

Rasti u pasua me një tjetër skandal, ku më 8 prill 2025 në Portin e Durrësit kishte mbërritur një tjetër ngarkesë prej rreth 30 tonësh fileto pule nga Brazili, e cila i përkiste të njëjtës parti produkti me një ngarkesë të mëparshme. Por dokumentacioni tregtar ishte ndryshuar duke zëvendësuar emrin e kompanisë “AMG FOOD” me “MAG.N.G”, një tjetër subjekt i lidhur me Goxhën.

Po në prill të vitit 2025, Arben Goxhaj, i lidhur me “AMG Food”, u ndalua pasi ishte shpallur në kërkim në kuadër të hetimeve për çështjen e mishit të pulës me salmonelë. Ai dhe persona të tjerë u hetuan në lidhje me këtë rast.

Më shumë se një vit pas këtij episodi, kompania del sërish në vëmendje të autoriteteve, këtë herë pasi kokaina u gjet në kontejnerin me ngarkesën e porositur prej saj.