Gazetari Bekim Bici ka publikuar në rrjetet sociale një video ku shfaqet kreu i partisë “Mundësia”, Agron Shehaj, gjatë lëvizjes në një aeroport ndërkombëtar.
Në pamjet e shpërndara nga Bici, Shehaj duket teksa transportohet nga avioni drejt terminalit me një automjet VIP të aeroportit, ndërsa pjesa tjetër e pasagjerëve udhëtojnë me autobus, siç ndodh zakonisht në këto raste.
Postimi është shoqëruar me një koment ironik nga gazetari, i cili vë në dukje kontrastin mes imazhit publik të politikanëve dhe sjelljes së tyre në situata të caktuara.
“Disa pretendojnë se populli i do, madje e tregojnë edhe kur bëjnë një foto, ama sa e duan thjeshtësinë e popullit, duket qartë. Qirren nëpër parlament sa herë kamerat janë të ndezura, mbyten duke nxjerrë foto e video nga ‘dashuria’ e madhe që kanë për qytetarët, por duket se kanë ‘alergji’ të rrinë në një autobus… U duhet dikush t’ua hapë derën”, shkruan Bici.
Videoja ka ngjallur reagime dhe komente të ndryshme në rrjetet sociale, ku ndjekësit e konsiderojnë si një privilegj të panevojshëm për një politikan që promovon afërsinë me qytetarët.
