Një operacion është zhvilluar mëngjesin e kësaj të enjteje, më 26 mars, mes drejtorisë vendore të policisë Korçë dhe drejtorisë së kufirit e migracionit, që ka përfunduar me kapjen e rreth 30 kilogramëve drogë në doganën e Kapshticës.
Gazetarja e Klan News Daniela Zisi, raporton se nga ky operacion është vënë në pranga një shtetas grek në pikën kufitare të Kapshticës, pasi droga u gjet në mjetin e tij.
Sipas informacioneve paraprake, shtetasi grek ka modifikuar një pjesë të mjetit për të bërë të mundur futjen e lëndës narkotike kanabis sattiva.
Sasia e kapur është rreth 30 kilogramë. Shtetasi grek u kap në tentativë për të kaluar drejt vendit fqinj, ndërsa policia ka ndërhyrë menjëherë për të zbuluar sasinë e drogës të fshehur në mjet.
Ky i fundit, dyshohet se e ka marrë drogën në shtetin shqiptar dhe ka dashur ta cojë drejt shtetit grek ndërsa është arrestuar nga policia. Hetimet për rastin vijojnë për të zbardhur edhe persona të tjerë që kanë lidhje me trafikun ndërkombëtar të lëndëve narkotike.
