Policia e Lezhës ka zbardhur vjedhjen e ndodhur në një shkollë 9-vjeçare të qytetit, ku u grabitën pajisje teknologjike dhe u dëmtuan ambientet e brendshme.
Pas denoncimit të drejtoreshës së shkollës, e cila njoftoi se ishin thyer pesë dyer dhe mungonin dokumente e pajisje, grupi hetimor ka identifikuar dy të mitur të moshës 17 dhe 14 vjeç si autorë të dyshuar.
Nga këqyrja e pamjeve të kamerave të sigurisë ka rezultuar se në këtë vjedhje kanë marrë pjesë gjithsej gjashtë persona, të cilët pasi thyen dyert, morën me vete 16 laptopë dhe pajisjen DVR ku regjistroheshin pamjet e kamerave.
Aktualisht dy të miturit po procedohen në gjendje të lirë, ndërsa policia po punon intensivisht për të identifikuar katër bashkëpunëtorët e tjerë dhe për të gjetur pajisjet e vjedhura që i përkasin shkollës.
