Kryeministri britanik Keir Starmer ka deklaruar se nuk do të zgjedhë midis SHBA-ve dhe Kinës, përpara vizitës së parë të një lideri britanik në Pekin pas plot 8 vitesh.
Ai theksoi se Mbretëria e Bashkuar do të ruajë marrëdhënie të forta me SHBA-të në fushën e biznesit, sigurisë dhe mbrojtjes, por paralajmëroi se të injorosh Kinën nuk do të ishte zgjedhje e mençur, duke e konsideruar vendin si një mundësi të madhe për kompanitë britanike.
Dhjetëra drejtues biznesesh do të udhëtojnë me të për të shfrytëzuar këto mundësi.
Vizita, që përfshin Pekinin dhe Shanghai-n, vjen pas javësh të tensionuara në marrëdhëniet ndërkombëtare dhe pas miratimit të diskutueshëm të një ambasade të re kineze në Londër, që kritikët paralajmëruan se mund të shfrytëzohet për spiunazh.
“Shpesh më kërkojnë të zgjedh midis vendeve. Nuk e bëj këtë zgjedhje”, tha Starmer, duke kujtuar edhe përvojën e tij me marrëveshjen tregtare me SHBA-të.
Ai gjithashtu paralajmëroi se marrëdhënia me Kinën nuk do të komprometojë sigurinë kombëtare dhe premtoi se do të ngrejë çështje të ndjeshme si të drejtat e njeriut dhe situata e Jimmy Lai, manjatit mediatik nga Hong Kongu me shtetësi britanike, i cili u shpall fajtor për bashkëpunim me forca të huaja.
Lord Chris Patten, guvernatori i fundit britanik i Hong Kongut, tha se do të ishte “patetik” nëse Starmer nuk do të trajtonte rastin e Lai-t, duke theksuar se politika britanike nuk mund të bazohet në idenë se për të bërë biznes me Kinën duhet të injorosh çdo gjë që ajo nuk pëlqen.