“Do të ketë një të ftuar special sot”. Kështu kishte paralajmëruar Karoline Leavitt, zëdhënësja e Donald Trump, surprizën e së martës, 20 janar. I ftuari ishte vetë presidenti amerikan, i cili vendosi të marrë pjesë personalisht në takimin me gazetarët në Shtëpinë e Bardhë, një vendim që, sipas CNN, ka ardhur për arsye që shkojnë përtej vetëlavdërimit publik për “One Year” në krye të presidencës.
Në tryezën e tij në Zyrën Ovale, Trump kishte vendosur fotografitë e dhjetëra personave të arrestuar nga ICE (Agjencia për Emigracionin dhe Doganat). Fotot ishin printuar nga stafi i tij dhe presidenti kishte këmbëngulur që t’i shfaqte vetë para mediave, duke argumentuar se ekipi i tij nuk kishte qenë mjaftueshëm efektiv në shpjegimin dhe mbrojtjen e punës së ICE. Sipas Trump, operacionet e këtij institucioni përbëjnë një sukses dhe janë thelbësore për realizimin e kapitullit të parë të agjendës së tij qeverisëse: Luftën kundër emigracionit të paligjshëm.
Trump e konsideron emigracionin si temën vendimtare që e riktheu në Shtëpinë e Bardhë, madje më shumë se inflacioni apo ekonomia. Burime pranë presidentit tregojnë se ai është i frustruar dhe i shqetësuar, pasi beson se administrata e tij po humbet kontrollin e mesazhit publik. Pikërisht për këtë arsye ai vendosi të shfaqej personalisht në sallën e shtypit.
Presidenti ka pranuar, ashtu si edhe JD Vance gjatë vizitës së tij të enjten në Minneapolis, se ka pasur gabime dhe se agjentët mund të gabojnë. Megjithatë, sipas tij, kjo nuk e ndryshon faktin që arrestimet dhe dëbimet e personave me precedent penal janë të domosdoshme. Ditët e fundit, në Shtëpinë e Bardhë, një grup këshilltarësh ka diskutuar rreziqet që vijnë nga protestat në Minneapolis dhe mënyrat për të kufizuar dëmet. Prej këtu ka lindur edhe kundërofensiva: vënia në plan të parë e “sukseseve” të ICE për të zbehur imazhet dhe lajmet mbi protestat.
“Nuk ka diskutime për uljen e toneve; përkundrazi, duam t’ua shpjegojmë njerëzve edhe më agresivisht pse kjo po ndodh”, tha një zyrtar për CNN.
Por situata është komplikuar edhe më shumë pas vrasjes së 37-vjeçarit Alex Pretty në South Minneapolis, ndalimit të një vajze dyvjeçare dhe përdorimit si karrem për të kapur babanë e një fëmije pesëvjeçar. Këto raste kanë shtuar zemërimin publik dhe gjithnjë e më shumë amerikanë po denoncojnë veprimet e autoriteteve federale dhe të administratës Trump, në vend që të mbështesin metodat e ICE.
Në ditët e fundit, hendeku mes qëndrimit të administratës dhe protestuesve në Minneapolis, si edhe politikanëve lokalë, guvernatori Tim Walz dhe kryebashkiaku Jacob Frey, është thelluar. Departamenti i Drejtësisë ka nisur hetime ndaj një grupi aktivistësh që të dielën e kaluar hynë në një kishë duke kundërshtuar një pastor të konsideruar pranë ICE. Ndërkohë, Walz dhe Frey janë vënë nën hetim për pengim të operacioneve të rendit publik. Trump ka akuzuar sërish “agjitatorët profesionistë” dhe ka drejtuar gishtin nga Walz, duke e fajësuar për nxitje të trazirave.
Nga ana tjetër, protestat në Twin Cities nuk po zbehen. Para Whipple Federal Building, dhjetëra aktivistë mbajnë një protestë të vazhdueshme kundër ICE. Të premten u zhvillua një grevë e përgjithshme me mbylljen e restoranteve dhe lokaleve, ndërsa aksionet kundër ICE vazhdojnë pavarësisht paralajmërimeve dhe ndërhyrjeve të forta të agjentëve.
Opsionet që mbeten janë angazhimi i Gardës Kombëtare dhe thirrja e Insurrection Act, një ligj i përdorur për herë të fundit në vitin 1992 gjatë trazirave në Los Anxhelos, i cili lejon vendosjen e forcave ushtarake në territorin amerikan, si përjashtim nga Posse Comitatus Act që normalisht e ndalon një gjë të tillë.