Me përkushtim, sakrificë dhe profesionalizëm, punonjësit e Policisë së Shtetit në Durrës dhe në shumë zona të vendit kanë qenë në terren, duke ofruar ndihmë të menjëhershme për qytetarët e prekur nga përmbytjet dhe përdoruesit e rrugës në situata të rrezikshme.
Drejtori i Përgjithshëm i Policisë së Shtetit, Ilir Proda, ka shprehur mirënjohjen për punonjësit e Policisë që gjatë gjithë ditës sot në 6 janar dhe që vijojnë ende, kanë treguar përgjegjshmëri, angazhim, sakrificë dhe humanizëm në shërbim të qytetarëve. Ai thekson se puna e tyre ka qenë thelbësore për sigurimin e rendit, mbrojtjen e jetës dhe të pronës së qytetarëve, gjatë situatave të vështira të shkaktuara nga moti i keq.
“Falënderoj çdo punonjës të Policisë që ka qenë në terren, duke ndihmuar qytetarët në nevojë, duke mbajtur rrugët të sigurta dhe duke treguar profesionalizëm dhe përkushtim të jashtëzakonshëm. Sakrifica dhe puna juaj nuk kalojnë pa u vënë re”, shprehet Proda.
Ai gjithashtu falënderon qytetarët që kanë dërguar në adresat e Policisë dhjetëra mesazhe mirënjohjeje dhe video nga puna e punonjësve në terren, duke u shprehur se vlerësimi i qytetarëve është një motiv shtesë për punonjësit e Policisë që të vazhdojnë me përkushtim.
Punonjësit e Policisë kanë qëndruar në gatishmëri të plotë, duke ofruar ndihmë për qytetarët që kanë hasur probleme në qarkullimin e rrugëve të bllokuara, duke asistuar në evakuimin e familjeve të rrezikuara nga uji, si dhe duke koordinuar me strukturat e tjera të emergjencave, për të siguruar një reagim të shpejtë dhe të efektshëm ndaj situatës.
Kjo përgjegjësi dhe përkushtim i vazhdueshëm i Policisë së Shtetit vërteton jo vetëm profesionalizmin e strukturave ligjzbatuese, por edhe humanizmin dhe solidaritetin që punonjësit tregojnë në shërbim të qytetarëve në çdo situatë emergjente. Në këtë kuadër, Drejtori Proda thekson se puna e policëve nuk është vetëm detyrë, por një mision që kërkon sakrificë, përkushtim dhe empati ndaj qytetarëve, veçanërisht në situata të jashtëzakonshme si ato të përmbytjeve dhe reshjeve të dendura.
