30 mijë ushtarë nga vendet e Bashkimit Europian janë gati të zbarkojnë në Ukrainë. Burime për median e njohur amerikane, “Washington Post” po marrin në konsideratë këtë projekt në mënyrë që të parandalojnë në minutë të fundit një pakt të fshehtë midis Rusisë dhe Shteteve të Bashkuara në dëm të Ukrainës.
Sipas “Post”, plani evropian do të kërkonte një forcë “parandaluese” të disa brigadave, ndoshta 25,000-30,000 ushtarë, të cilët nuk do të vendoseshin përgjatë vijës së frontit me Rusinë, por do të ishin gati të ndërhynin si një shfaqje force nëse forcat ruse do të përpiqeshin të rifillonin luftën, përcjell A2.
Kërkesat evropiane nga SHBA do të përfshijnë aftësitë e inteligjencës, mbikëqyrjes dhe zbulimit, si dhe mbulimin e mundshëm ajror ose një lloj ndihme të mbrojtjes ajrore për të mbrojtur forcën, thanë burimet, të cilët ranë dakord se mbështetja e SHBA do të ishte vendimtare dhe se ata do të mirëprisnin paralajmërimet e qarta nga Uashingtoni për Rusinë, qoftë publike apo private, kundër çdo përpjekjeje për të sulmuar forcën ose për të rindezur një konflikt të plotë.
Një tjetër pyetje kyçe për evropianët është se si të përgjigjen nëse Rusia do të sulmonte forcën evropiane: në tryezë është mundësia e futjes së një klauzole të mbrojtjes reciproke midis vendeve të përfshira në koalicionin evropian, e cila nuk do të vepronte nën flamurin e NATO-s.
Sakaq, Ukraina dëshiron që Evropa të caktojë sa më shpejt një përfaqësues për negociatat e mundshme të paqes me Shtetet e Bashkuara dhe Rusinë, tha Ihor Zhovkva, nënkryetari i zyrës së Volodymyr Zelensky, sipas Bloomberg. “Duhet të jetë një vendim i marrë shpejt,” tha Zhovkva.
“Shpresoj menjëherë pas takimit të Parisit. Ne duhet të veprojmë, jo të reflektojmë,” shtoi ai.