Tetsuya Yamagami, i akuzuari për vrasjen e ish-kryeministrit japonez Shinzo Abe, ka kërkuar për herë të parë falje nga familja e tij.
Në seancën e së enjtes, 04.12.2025, Yamagami, i cili më parë pranoi fajin për vrasje, tha se ndihet “thellësisht i keqardhur” ndaj bashkëshortes së Abe, Akie.
Abe u qëllua me armë të bërë vetë gjatë një tubimi politik në qytetin perëndimor të Nara më 8 korrik 2022 dhe vdiq të njëjtën ditë, duke shkaktuar tronditje ndërkombëtare. Ai njihej për politikën e tij të ashpër të jashtme dhe strategjinë ekonomike të njohur si “Abenomics”.
“U kam shkaktuar familjes tre vjet e gjysmë vuajtje. Nuk kam asnjë justifikim”, tha Yamagami në gjykatë, sipas mediave lokale.
Ai tha para hetuesve se kishte sulmuar Abe sepse e bënte përgjegjës për mbështetjen e tij ndaj Kishës së Unifikimit, e cila, sipas Yamagamit, kishte falimentuar nënën dhe familjen e tij.
Akuzat e tij çuan në hetime ndaj Kishës së Unifikimit, e cila filloi në Korenë e Jugut dhe njihet për ceremonitë masive të martesave. Në mars të këtij viti, një gjykatë në Tokio urdhëroi shuarjen e Kishës, një vendim që organizata tha se do ta sfidojë “deri në fund”.
Kisha e Unifikimit ka qenë e kontestuar edhe para vrasjes së Abe, për mësimin se martesa është qendrore për shpëtimin shpirtëror. Gjysmëgjyshi i Abe, Nobusuke Kishi, i cili gjithashtu ka qenë kryeministër, ishte i afërt me Kishën për natyrën e saj anti-komuniste, dhe Abe kishte folur në ngjarje të lidhura me grupin.
Gjatë një seance muajin e kaluar, prokurorët lexuan një deklaratë të bashkëshortes së Abe, e cila shkroi “humbja e një bashkëshorti nuk do të lehtësohet.”