Presidentja e Komisionit Europian, Ursula von der Leyen, ka bërë një vlerësim të qartë mbi negociatat e fundit për paqen në Ukrainë, duke mirëpritur përpjekjet e udhëhequra nga presidenti amerikan, Donald Trump. Ajo thekson se, megjithëse nevojiten përpjekje të mëtejshme, “falë punës së Ukrainës, SHBA-ve dhe nesh, europianëve, gjatë këtyre ditëve në Gjenevë, kemi një pikënisje”.
Von der Leyen nënvizon se marrëveshja duhet të sigurojë “një paqe të drejtë dhe të qëndrueshme” dhe “siguri reale për Ukrainën dhe Europën”, pa asnjë kufizim mbi forcat e armatosura të Ukrainës, të cilat, sipas saj, “do ta linin vendin të pambrojtur ndaj sulmeve të ardhshme”.
“Bëhet fjalë po aq për tërheqjen e forcave si për sigurinë e Europës, sepse siguria e Ukrainës është siguria e Europës”, shton ajo.
Presidentja e Komisionit Europian thekson gjithashtu se marrëveshja duhet të respektojë sovranitetin e Ukrainës, duke bërë një paralajmërim.
“E dimë që mendësia e Rusisë nuk ka ndryshuar që nga koha e Jaltës, duke parë kontinentin tonë në terma të sferave të ndikimit. Duhet të jemi të qartë që nuk mund të ketë ndarje të njëanshme të një kombi sovran europian dhe se kufijtë nuk mund të ndryshohen me forcë. Nëse sot legjitimojmë dhe formalizojmë cenimin e kufijve, hapim dyert për më shumë luftëra nesër dhe nuk mund ta lejojmë këtë”, përfundon von der Leyen.