Një grabitës serial është arrestuar nga policia pas një aksioni të shtrirë në Dibër dhe Tiranë. 21-vjeçari i vënë në pranga është ndaluar në kuadër të operacionit “Markat”, pas një hetimi të zgjeruar nga Policia e Durrësit, në bashkëpunim me Komisariatin nr. 4 Tiranë dhe Policinë e Bulqizës.
I arrestuari, shtetasi K. Ll., 21 vjeç, me banim në Bulqizë, dyshohet se ka vjedhur automjete në zona të ndryshme të Durrësit dhe Dibrës, të cilat i shiste te persona me precedentë penalë të cilët më pas i përdornin në ngjarje kriminale.
Policia fillimisht u vu në gjurmët e 21-vjeçarit pasi ai kishte vjedhur një automjet tip “Benz” në pronësi të shtetasit V. Xh., në fshatin Gjoricë të Bulqizës. Në momentin që ka parë efektivët, i riu është larguar me shpejtësi në drejtim të Tiranës por efektivët e Komisariatit nr. 4 në kryeqytet bënë të mundur bllokimin e automjetit dhe arrestimin e tij në flagrancë, duke e dorëzuar më pas te Policia e Durrësit.
Hetimet kanë zbuluar se 21-vjeçari ka vjedhur edhe tre automjete të tjera në lagjet nr. 15 dhe nr. 17 të Durrësit, si dhe sende personale brenda një automjeti tjetër në të njëjtën zonë.
Gjatë kontrollit, Policia ka sekuestruar si prova materiale katër makina të vjedhura të markave: Benz, Toyota, Volkswagen dhe Ford Focus.
Ndërkohë, Prokuroria e Durrësit, vijon punën për zbardhjen e vjedhjeve të tjera që dyshohet se janë kryer nga i arrestuari.