Partia Demokratike mban sot më 15 dhjetor Foltoren e radhës përpara godinës së Kryeministrisë, në një tubim që pritet të zhvillohet nga ora 18:00 deri në 20:00.
Aktiviteti pritet të mbledhë mbështetës dhe simpatizantë të opozitës, ndërsa Policia e Tiranës ka bërë të ditur se ka marrë të gjitha masat për garantimin e rendit, sigurisë dhe mbarëvajtjes së tubimit.
Në njoftimin zyrtar, Policia e Tiranës thekson se masat janë planifikuar me qëllim që tubimi të zhvillohet i qetë dhe pa incidente, duke garantuar njëkohësisht lëvizjen dhe sigurinë e qytetarëve. “Policia e Tiranës ka marrë të gjitha masat e nevojshme, me qëllim garantimin e rendit dhe mbarëvajtjes së tubimit”, thuhet në deklaratë.
Sipas planit të masave, nga ora 15:00 e deri në përfundim të tubimit do të ketë bllokim të qarkullimit të automjeteve në disa nga akset kryesore të kryeqytetit. Konkretisht, do të bllokohet bulevardi “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”, si edhe rrugët “Ukraina e Lirë”, “Papa Gjon Pali II” dhe “Ismail Qemali”.
Policia sqaron gjithashtu se, në varësi të dinamikës së tubimit, mund të vendosen kufizime të përkohshme edhe në akse të tjera rrugore. Për të shmangur vështirësitë në qarkullim, janë parashikuar devijime të trafikut në rrugë alternative, në mënyrë që qytetarët të kenë sa më pak pengesa gjatë orëve të tubimit.
Policia e Tiranës u bën thirrje drejtuesve të automjeteve të shmangin akset që do të bllokohen dhe të përdorin itinerare alternative.
“Apelojmë për drejtuesit e automjeteve të shmangin lëvizjen në akset që do të bllokohen, në mënyrë që të mos pengohet lëvizja e lirë e pjesëmarrësve në tubim”, theksohet në njoftim.
Nga ana e saj, Partia Demokratike e konsideron Foltoren një moment të rëndësishëm të komunikimit politik me qytetarët dhe një hapësirë për shprehjen e qëndrimeve të saj.
Foltorja e Partisë Demokratike është kthyer në një format të vazhdueshëm takimesh dhe tubimesh publike të opozitës, ku drejtuesit e saj, si dhe qytetarët adresojnë problematike të ndryshme të vendit.