Presidenti amerikan Donald Trump deklaroi të hënën se administrata e tij do të dërgojë armë shtesë për mbrojtjen në Ukrainë, pas një ndalese të përkohshme në disa dërgesa armësh javën e kaluar.
“Do të dërgojmë më shumë armë. Duhet ta bëjmë ata duhet të jenë në gjendje të mbrohen,” tha Trump përpara një darke me kryeministrin izraelit Benjamin Netanyahu. “Po sulmohen shumë rëndë. Do të duhet të dërgojmë më shumë armë kryesisht mbrojtëse, por ata po goditen shumë fort.”
Deklaratat e fundit të presidentit vijnë pas njoftimit të një zyrtari të lartë të Shtëpisë së Bardhë për CNN javën e kaluar, se administrata kishte pezulluar disa dërgesa armësh drejt Ukrainës, përfshirë raketa të mbrojtjes ajrore. Vendimi pasoi një rishikim të shpenzimeve ushtarake dhe ndihmës së SHBA për vendet e huaja, i miratuar nga Sekretari i Mbrojtjes, Pete Hegseth.
Zëvendëssekretarja për shtyp në Shtëpinë e Bardhë, Anna Kelly, deklaroi në atë kohë se vendimi u mor “për të vënë interesat e Amerikës të parat”.
Disa zyrtarë amerikanë kanë sugjeruar se rishikimi i ndihmës për Ukrainën lidhet pjesërisht me përpjekjen e Pentagonit për të përqendruar vëmendjen ndaj Kinës dhe për t’u përgatitur për konflikte të mundshme në rajonin e Paqësorit një prioritet ky i theksuar nga kreu i politikës së Pentagonit, Elbridge Colby.
“Departamenti i Mbrojtjes vazhdon t’i ofrojë presidentit opsione të fuqishme për të vazhduar ndihmën ushtarake për Ukrainën, në përputhje me synimin e tij për t’i dhënë fund kësaj lufte tragjike,” tha Colby në një deklaratë. “Në të njëjtën kohë, Departamenti po analizon dhe përshtat qasjen e tij, duke ruajtur gatishmërinë e forcave amerikane për përparësitë e mbrojtjes kombëtare.”
Rusia mirëpriti pezullimin e disa dërgesave, duke pretenduar pa prova se SHBA nuk ka më rezerva të mjaftueshme armësh.
Zëdhënësi kryesor i Pentagonit, Sean Parnell, tha të hënën: “Me urdhër të Presidentit Trump, Departamenti i Mbrojtjes do të dërgojë armë mbrojtëse shtesë në Ukrainë për të siguruar që ukrainasit të mund të mbrohen ndërsa ne punojmë për një paqe të qëndrueshme. Kuadri ynë për shqyrtimin e dërgesave ushtarake në të gjithë botën mbetet në fuqi dhe është thelbësor për prioritetet e mbrojtjes në kuadër të doktrinës ‘Amerika e Para’.”
SHBA ka qenë donatori më i madh i ndihmës ushtarake për Ukrainën që nga fillimi i agresionit të plotë rus në vitin 2022, duke siguruar sisteme të mbrojtjes ajrore, dronë, raketahedhës, radarë, tanke dhe armë kundërblindazhi, ndihmë që ka ngjallur shqetësime për reduktimin e rezervave të armëve amerikane.
Trump më herët kishte ndalur të gjitha dërgesat ushtarake për Ukrainën në muajin mars, pas një debati të ashpër në Zyrën Ovale me presidentin ukrainas Volodymyr Zelensky. Dërgesat u rinisën rreth një javë më pas.
Vendimi për të dërguar armë shtesë vjen gjithashtu pas bisedave të ndara që Trump zhvilloi javën e kaluar me presidentin rus Vladimir Putin dhe me presidentin ukrainas Zelensky. Më pas, Trump tha se biseda me Putinin kishte qenë “zhgënjyese” dhe se “nuk kishte asnjë përparim” drejt një armëpushimi.
Ndërkohë, Zelensky ka kërkuar prej javësh nga aleatët perëndimorë që të forcojnë mbrojtjen ajrore të vendit të tij pas shtimit të sulmeve ajrore ruse. Vetëm disa orë pas bisedës telefonike mes Trump dhe Putinit, Rusia lëshoi një numër rekord dronësh mbi Ukrainë natën e së premtes.
Trump deklaroi të premten se SHBA po shqyrton kërkesën e Ukrainës për më shumë sisteme mbrojtëse “Patriot”, pas një bisede që e cilësoi si “shumë të mirë” me Zelenskyn. Ky i fundit e përshkroi bisedën si “më të mirën dhe më produktiven” që kishte zhvilluar me presidentin amerikan.
Të hënën, Trump ripohoi pakënaqësinë e tij ndaj liderit rus, duke thënë: “Nuk jam aspak i kënaqur me presidentin Putin.”