Përplasja mes institucioneve për pagat e magjistratëve sa vjen edhe thellohet. Këshilli i Lartë Gjyqësor, përmes një letre, i ka kërkuar Ministrisë së Financave ekzekutimin e pagesave.
Kjo lëvizje, vjen pasi ministri i Financave Petrit Malaj, kërkoi që listëpagesat dhe urdhër-shpenzimet për muajin gusht të paraqiten sërish sipas metodologjisë së përdorur deri në muajin korrik.
Ministria argumenton se rritja e pagave të magjistratëve nuk është miratuar nga Kuvendi dhe se strukturat e Thesarit nuk mund të ekzekutojnë pagesa të përllogaritura mbi një formulë që, sipas saj, nuk ka marrë miratimin parlamentar.
“Ministria e Financave, as nuk mund të zëvendësojë Kuvendin në ushtrimin e funksionit normativ, as nuk mund të përcaktojë, nëpërmjet procedurave të ekzekutimit buxhetor, formulën konkrete të pagës dhe aq më pak mund të ekzekutojë urdhra që vijnë nga autoritete të nderuara të pushtetit gjyqësor, të cilat nuk e kanë autoritetin ekskluziv parlamentar të miratimit të ndryshimeve në buxhetin e shtetit shqiptar”, thuhet në qëndrimin e Ministrisë së Financave.
Sipas Ministrisë, sapo Thesari të ketë në dispozicion listëpagesat sipas parametrave që ajo i konsideron në fuqi, pagesat do të ekzekutohen me përparësi dhe pa vonesë.
“Fakti që pagat e institucioneve të tjera të sistemit të drejtësisë janë ekzekutuar normalisht dëshmon këtë. SPAK, Gjykata Kushtetuese dhe institucione të tjera kanë paraqitur listëpagesat e muajit gusht sipas metodologjisë ekzistuese dhe pagesat e tyre janë kryer rregullisht”, deklaron më tej Ministria.
Përplasja lidhet me vendimin e Këshillit të Lartë Gjyqësor për mënyrën e përllogaritjes së pagave pas vendimit të Gjykatës Kushtetuese.