Ka mbërritur në Gjykatën e Posaçme Kujtim Cakrani, avokati i kryetarit të Partisë së Lirisë, Ilir Metës. Kjo sepse këtë të premte, më 19 shtator, do të shqyrtohet kërkesa për revokim mase e Ilir Metës.
Sakaq, me datë 9 tetor, në një dhomë këshillimi në Gjykatën e Lartë do të shqyrtohet gjithashtu rekursi i bërë nga ish-presidenti Meta për masën e sigurisë, që i është caktuar prej rreth një viti nga Gjykata e Posaçme dhe vazhdon të lihet në fuqi deri më tani nga institucionet e drejtësisë ku ka apeluar. Rekursi nga kryetari i Partisë së Lirisë, vjen pas vendimit të fundit nga apeli i Gjykatës së Posaçme që e la të pandryshuar masën e sigurisë për të.
Sjellim ndërmend se më 29 gusht, Prokuroria e Posaçme Kundër Korrupsionit dhe Krimit të Organizuar mbylli hetimet dhe çoi për gjykim Ilir Metën dhe Monika Kryemadhin. Ndaj tyre rëndojnë nga tre akuza: korrupsion pasiv, pastrim parash dhe mosdeklarim i pasurisë.
Sipas SPAK, pas hetimeve të kryera janë zbuluar disa skema korrupsioni dhe përdorimi të pushtetit politik. Për gjykim janë dërguar edhe tre persona të tjerë.
Seanca e parë paraprake për ish-presidentin Ilir Meta, ish-bashkëshorten e tij Kryemadhi dhe tre të tjerët, do të zhvillohet më 25 shtator dhe dosja do të shqyrtohet nga gjyqtarja Irena Gjoka. Ajo ka në dorë të përcaktojë nëse do ta kalojë dosjen për gjykim, do ta kthejë sërish në SPAK ose të pushojë hetimet.