Sipas një zyrtari të Shtëpisë së Bardhë, aktualisht “nuk ka plane” për një takim të menjëhershëm mes presidentit amerikan Donald Trump dhe homologut të tij rus, Vladimir Putin, pavarësisht deklaratave të fundit të republikanit se një samit mes tyre do të zhvillohej brenda dy javësh në Budapest për të diskutuar mbi luftën në Ukrainë.
Javën e kaluar, Trump kishte paralajmëruar se një takim i tillë do të ndodhte së shpejti, por sipas BBC planet duket se janë pezulluar. Një takim përgatitor mes Sekretarit të Shtetit amerikan, Marco Rubio dhe ministrit të Jashtëm rus, Sergei Lavrov, ishte parashikuar të mbahej këtë javë, por Shtëpia e Bardhë njoftoi se një “telefonatë produktive” mes tyre e kishte bërë të panevojshëm takimin. Nuk janë dhënë detaje shtesë për arsyet e shtyrjes së bisedimeve.
Trump kishte diskutuar idenë e një samiti në Budapest gjatë një bisede telefonike me Putinin, vetëm një ditë para se të priste në Uashington presidentin ukrainas Volodymyr Zelensky. Mediat amerikane raportuan se takimi mes Trump dhe Zelensky ishte “i tensionuar”, me pretendime se Trump kishte kërkuar nga Ukraina të dorëzonte territore në lindje të vendit në këmbim të një marrëveshjeje paqeje me Rusinë.
Megjithatë, të hënën Trump mbështeti një propozim armëpushimi të inicuar nga Kievi dhe disa liderë evropianë për ngrirjen e konfliktit përgjatë vijës aktuale të frontit. “Le të mbetet ashtu siç është,” deklaroi ai.
Nga ana tjetër, Moska e ka kundërshtuar këtë ide. Ministri i Jashtëm rus, Sergei Lavrov, theksoi se Rusia është e interesuar për “paqe afatgjatë dhe të qëndrueshme”, duke nënkuptuar se një ngrirje e konfliktit do të ishte vetëm një zgjidhje e përkohshme. Ai përsëriti kërkesat maksimale të Kremlinit, përfshirë njohjen e plotë të sovranitetit rus mbi Donbasin dhe çmilitarizimin e Ukrainës, kërkesa që Kievi dhe partnerët e tij evropianë i kanë quajtur të papranueshme.
Presidenti ukrainas, Zelensky, u shpreh se diskutimet për vijën e frontit përbëjnë “fillimin e diplomacisë”, por shtoi se Rusia “po bën gjithçka për ta shmangur diplomacinë”. Ai nënvizoi se tema e vetme që mund të tërheqë vëmendjen e Moskës është furnizimi i Ukrainës me armë me rreze të gjatë veprimi.
Siç shkruan BBC, telefonata e papritur e Putinit me Trump javën e kaluar ndodhi në një moment kur qarkullonin zëra se SHBA-të po përgatiteshin t’i dërgonin Ukrainës raketa Tomahawk, të afta për të goditur objektiva brenda territorit rus. Zelensky tha se pikërisht kjo çështje kishte detyruar Moskën të rifillonte kontaktet diplomatike, duke e cilësuar presionin amerikan si një “investim të fortë në diplomaci”.