Vetëm pak orë pasi qeveria shqiptare i dha dritën jeshile një prej investimeve më të mëdha amerikane në sektorin energjetik, përfaqësuesja më e lartë e Shteteve të Bashkuara në Tiranë u shfaq në një tjetër institucion kyç të shtetit shqiptar: Gjykatën Kushtetuese.
Zëvendëskryeministrja dhe ministrja e Infrastrukturës dhe Energjisë, Belinda Balluku, i dorëzoi sot certifikatën e autorizimit kompanisë amerikane CWP për ndërtimin e një parku eolik me kapacitet 600 MW në Tropojë, një investim strategjik që forcon praninë amerikane në sektorin energjetik shqiptar.
Në ceremoninë e prezantimit të projektit ishte e pranishme edhe e ngarkuara me punë e Ambasadës së Shteteve të Bashkuara në Tiranë, Nancy VanHorn, duke konfirmuar mbështetjen e Uashingtonit për kompanitë amerikane që investojnë në Shqipëri.
Por mesazhi amerikan nuk u ndal vetëm te energjia. Pak orë më pas, VanHorn u paraqit në Gjykatën Kushtetuese, ku përgëzoi kryetaren e sapoemëruar, Fiona Papajorgji, dhe theksoi se mbështetja afatgjatë e SHBA lidhet drejtpërdrejt me prioritetet e Donald Trump, luftën kundër rrjeteve të narkotrafikut dhe krijimin e kushteve të barabarta për bizneset amerikane.
Mesazhi është i qartë: investimi amerikan dhe mbrojtja e tij ligjore janë prioritet strategjik për Uashingtonin. Besim që sot iu dha zyrtarisht nga qeveria shqiptare përmes certifikimit të CWP dhe që u pasua menjëherë me një prani simbolike, por domethënëse, në Gjykatën Kushtetuese — aty ku garantohet siguria juridike për investitorët amerikanë që synojnë të lulëzojnë në Shqipëri.
