Sulmet ukrainase me dronë ndaj territorit rus po intensifikohen dhe po rrëzojnë një nga narrativat kryesore të Vladimir Putinit, se lufta në Ukrainë nuk do të ndikonte në jetën e përditshme të qytetarëve rusë.
Vetëm gjatë natës mes 3 dhe 4 korrikut, dronët ukrainas goditën disa objekte të rëndësishme të industrisë së naftës në rajonin e Shën Petersburgut. Pas sulmeve, kërkimet më të shpeshta në Google nga Rusia lidhej me “Terminalin e naftës në Shën Petersburg” dhe fjalën “sulm”, një tregues i interesit dhe shqetësimit në rritje të qytetarëve.
Edhe ritmi i sulmeve është rritur ndjeshëm. Sipas të dhënave të publikuara nga The Economist, Ukraina kreu 335 sulme në territorin rus nga fillimi i luftës deri në fund të vitit 2024. Në vitin 2025 numri u rrit në 658, ndërsa këtë vit pritet të kalojë 800, me dronë më të saktë dhe me fuqi më të madhe shpërthyese.
Këto zhvillime po ushtrojnë presion mbi Kremlinin. Vetë Vladimir Putin ka pranuar se sulmet ndaj rafinerive kanë krijuar probleme në furnizimin me karburant, ndërsa lufta po rëndon gjithnjë e më shumë ekonominë ruse.
Megjithatë, kjo nuk nënkupton se Moska po afrohet drejt një kompromisi. Përkundrazi, lufta po shoqërohet me një transformim të strukturës së pushtetit në Rusi, ku shërbimet sekrete po marrin një rol gjithnjë e më të madh.
FSB-ja, pasardhëse e KGB-së sovjetike, po zgjeron kompetencat e saj. Nga prilli i këtij viti ka marrë nën administrim disa burgje të sigurisë së lartë, përfshirë burgun famëkeq Lefortovo në Moskë, si edhe kompetenca më të gjera për hetimin e personave të akuzuar për tradhti, spiunazh, terrorizëm dhe ekstremizëm.
Ndikimi i saj është bërë i dukshëm edhe në vendimet për kufizimin e internetit në disa rajone të Rusisë, masa që kanë shkaktuar pakënaqësi te qytetarët, por që u miratuan për arsye sigurie.
Në të njëjtën kohë, Kremlini po përballet me vështirësi në plotësimin e nevojave për personel ushtarak. Në rrjetet sociale janë publikuar video nga rajone të ndryshme të Rusisë ku shihen kontrolle dhe ndalime të të rinjve, të cilët sipas raportimeve dërgohen në ushtri. Janë raportuar gjithashtu presione ndaj studentëve për t’u regjistruar në forcat e armatosura.
Pavarësisht kostove të luftës, Moska nuk jep sinjale se është gati të tërhiqet. Përkundrazi, Kremlini vazhdon të besojë se zhvillimet politike në disa vende evropiane mund të ndryshojnë balancën në favor të tij dhe të dobësojnë mbështetjen e Bashkimit Evropian për Ukrainën. /Përshtatur nga “Corriere Della Sera”
