Prokurori i posaçëm, Adnan Xholi ka shpjeguar gjatë raportimit në Komisionin e Ligjeve procedurën që po ndiqet për përzgjedhjen e drejtuesit të ri të Byrosë Kombëtare të Hetimit.
Ai theksoi se shumë shpejt janë ende shtatë kandidatë në garë për kreun e “FBI-së shqiptare” dhe procedura do të finalizohet shumë shpejt.
“Drejtuesi i Prokurorisë së Posaçme dhe i Këshillit të Lartë të Prokurorisë që në fund të muajit dhjetor të vitit 2024 kanë diskutuar interpretime ligjore në lidhje me procedurën e riemërimit dhe institucioni që ushtron këtë procedurë, pra dihet që është institucioni respektiv. Për periudhën dhjetor 2024 shtator 2025 janë shkëmbyer gjithsej 27 shkresa midis dy institucioneve pra BKH-së, SPAK dhe KLP-së kur rreth 30% e tyre janë realizuar që në muajin shkurt pra gjashtë muaj përpara përfundimit të afatit. Numri i shkresave pra është një diçka teknike. Janë 11 shkresa të dërguara në periudhën dhjetor 2024-korrik 2025 duke përfshirë dhe kërkesën fillestare, përgjigjet dhe njoftimet për dokumentacione respektive ligjore. Prokuroria e Posaçme ka dërguar nëntë shkresa periudhën janar-maj 2025 për koordinim sqarimet ligjore në lidhje me kërkesat për shprehjen e interesit të drejtorit të BKH-së dhe KLP-ja ka pesë shkresa dërguar në periudhën dhjetor 2024-shtator 2025 për informim sqarime ligjore dhe vendime administrative. Në muajin shkurt të 2025-s, KLP ka përcaktuar qartë se përgjegjësia për këtë procedurë i takon Prokurorisë së Posaçme. Gjatë muajit mars ka vijuar korrespondenca me drejtorin e BKH-së dhe Këshillin e Lartë të Prokurorisë lidhur me procedurën e riemërimit, proces i aplikimit për herë të parë për të cilën ligji nuk parashikon udhëzim të detajuar. Në muajin prill 2025 është ngritur dhe komisioni i përzgjedhjes, është miratuar rregullorja e procedurave për zgjedhje dhe ish-drejtori i BKH-s i është kërkuar që të shprehi interesin për riemërimin brenda një afati dyjavor. Meqenëse drejtori nuk e shprehu interesin, më datë 22 maj 2025 u bë dhe shpallja publike, aplikuan 13 kandidatë nga të cilët janë kualifikuar shtatë prej tyre. Procesi ka edhe kohën e tij, ka vijuar me shpejtësi dhe profesionalizëm. Në korrik të 2025-s janë kryer të gjitha testet, fazat respektive, testimi fizik, me shkrim, arsyetimi ligjor me gojë dhe testi i poligrafit në monitorimin e ngushtë dhe të ekspertëve, partnerëve ndërkombëtarë të Shteteve të Bashkuara të Amerikës dhe të BE-së, të cilët kanë asistuar SPAK edhe në përgatitjen e testeve.
Në 15 gusht u përcollën për verifikim dosjet e komisionit të posaçëm te komisionit i verifikimit të figurës së pasurisë. Në rrugë administrative nuk ka pasur ndonjë ankesë vetëm një kandidat i skualifikuar për shkak të mospërmbushjes së kritereve, i cili ka bërë padi në gjykatë që në muajin shtator 2025. Funksionimi i BKH-së nuk ka lidhje, vazhdon normalisht sepse ka zgjidhur ligji. Kemi zëvendës drejtorin e BKH-së. është post administrativ, drejtues i këtij institucioni dhe nuk ka krijuar asnjë lloj pengese mospasje deri në këto momente e drejtori BKH-së. Ndërkohë që bëri me dije dhe drejtuesi, procedura është në përfundim e sipër dhe shumë shpejt do ketë dhe emrin përkatës që do i dërgohet KLP-së për emërimin”, shpjegoi Xholi.
Ndërkohë, kreu i SPAK Altin Dumani në ndërhyrjen e tij për të njëjtën temë diskutimi nënvizoi se duhen ndryshime në ligjin për përzgjedhjen e kreut të BKH-së, për të rregulluar më mirë rastet kur krijohen vakanca si ajo aktualja.
Por Dumani theksoi se BKH vijon punën normalisht dhe nën drejtimin e përkohshëm nga zv/drejtori, ashtu siç e përcakton ligji aktual.
“Për të shtuar pak diçka. Xholi e tha me detaje, por ajo që ligji e ka përcaktuar qartë, në mungesë të drejtorit të Byrosë Kombëtare të Hetimit, funksionet e tij ushtrohen nga zëvendës drejtori, prandaj nuk krijohet boshllëk, sigurohet vazhdimësia e institucionit. Aktualisht BKH-ja ka një zëvendësdrejtor, i cili në mungesë të drejtorit ushtron funksionet siç e përcakton ligji dhe tjetra është sa i takon dhe këtu ndoshta këtu ndoshta duhet, duhet parë ndryshimi ndërhyrja në ligj. Po të lexojmë ligjin nuk ka parashikuar qartë një datë se kur duhet të fillojë procesi i përzgjedhjes së drejtorit të ri. Dhe ne thamë ai ishte një proces që bëhej për herë të parë pasi sipas edhe parashikimeve ligjore ju dha mundësia fillimisht për t’u riemëruar drejtores, drejtoreshës që ushtronte, që ishte e zgjedhur në detyrën kreut t BKH-së. Shpresojmë sa më shpejt të kemi të drejtorin e ri të byrosë, por nuk ka krijuar asnjë lloj anomalie. Këtë e them me siguri”, tha Dumani.