Policia ka dalë me njoftim zyrtar për sasinë e eksplozivit në zonën e Velierës në Durrës. Teksa bën me dije se pakoja me lëndën plasëse e lidhur me një celular është çaktivizuar, thotë se po hetohet për zbardhjen e ngjarjes e cila deri më tani nuk ka ndonjë detaj më shumë.
“Më datë 20.05.2025, rreth orës 22:30, në lagjen nr. 1, në vendin e quajtur “Veliera”, është konstatuar një pako me lëndë të dyshuar plasëse. Menjëherë pas marrjes së njoftimit, shërbimet e Policisë shkuan në adresën e dhënë dhe vendosën perimetrin e sigurisë, ndërsa njësia antieksploziv e RENEA-s kreu veprimet për çaktivizimin e pakos me lëndë plasëse që ishte lidhur me një celular të ngjitur me natriban.
Grupi hetimor, në drejtimin e Prokurorisë, po punon për zbardhjen e rrethanave të rastit, identifikimin dhe kapjen e autorit/ve. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme”, thonë blutë e Durrësit.
