Gjykata Kushtetuese do të mblidhet sot, më 12 dhjetor, për të vendosur nëse do të marrë në shqyrtim kërkesën e kryeministrit Edi Rama lidhur me vendimin e Gjykatës së Posaçme (GJKKO), që pezulloi nga detyra zëvendëskryeministren dhe ministren e Infrastrukturës dhe Energjisë, Belinda Balluku.
Mbledhja e Gjyqtarëve do të zhvillohet për shkak të kompleksitetit të çështjes, volumit të madh të materialeve shoqëruese dhe agjendës së ngarkuar të gjykatës. Vendimi përfundimtar i trupës do të publikohet në faqen zyrtare të institucionit.
Më 2 dhjetor, çështja u shqyrtua fillimisht nga një kolegj prej tre gjyqtarësh, Sandër Beci, Sonila Bejtja dhe Marsida Xhaferllari, të cilët nuk arritën dakordësinë, me rezultatin 2 me 1. Për shkak të këtij qëndrimi të ndarë, dosja iu kalua Mbledhjes së Gjyqtarëve, ku tetë anëtarët e Gjykatës Kushtetuese do të marrin një vendim me shumicë votash.
Kërkesa e kryeministrit Rama synon të zgjidhë mosmarrëveshjen e krijuar mes ekzekutivit dhe GJKKO-së lidhur me pezullimin nga detyra të Ballukut. Kryeministri argumenton se vendimi i Gjykatës së Posaçme cenon imunitetin kushtetues të anëtarëve të Këshillit të Ministrave, parimin e ndarjes së pushteteve dhe kompetencat e përcaktuara nga Kushtetuta.
Paralelisht, vetë zv.kryeministrja Belinda Balluku ka kundërshtuar vendimin. Më 26 nëntor ajo apeloi ndalimin për të dalë jashtë vendit dhe pezullimin nga detyra, ndërsa më 2 dhjetor iu drejtua Gjykatës së Apelit për të kundërshtuar vendimin e GJKKO-së.
Në reagimet e tij publike, kryeministri Rama ka theksuar se ankimi në Gjykatën Kushtetuese është një çështje institucionale, jo politike. Ai ka paralajmëruar se vendimi për pezullimin e zv/kryeministres ka krijuar pasoja serioze në funksionimin e ekzekutivit, duke përmendur edhe pamundësinë për të zëvendësuar drejtues të institucioneve kyçe si ARRSH dhe KESH, për shkak se kompetenca për këto emërime i takon ministrit përkatës.
Rama ka vlerësuar se masa e pezullimit është një “ndërhyrje e papranueshme në trupin e qeverisë” dhe përbën precedent të rrezikshëm për balancën mes pushteteve në vend.
Belinda Balluku u pezullua nga GJKKO më 20 nëntor, ndërsa iu ndalua dhe e drejta për të dalë jashtë vendit. Ajo është marrë e pandehur për procedurat e tenderit të tunelit të Llogarasë dhe është nën hetim edhe për tenderin e lotit 4 të Unazës së Madhe.