Muzikanti britanik Paul McCartney iu bashkua thirrjeve për të kundërshtuar vendimin e Parlamentit Evropian për të ndaluar përdorimin e termave “hamburger” dhe “salçiçe” për produktet vegjetariane dhe bimore.
Siç shkruan The Guardian, vendimi i miratuar në tetor, ka ngjallur debate pasi shumë kritikë argumentojnë se ndalimi adreson një problem që nuk ekziston dhe mund të ngadalësojë progresin mbi objektivat klimatike.
Sipas rregullave të reja, emra si biftek, hamburger, salciçe apo eskallop nuk do të mund të përdoren për produkte të krijuara nga perime ose proteina bimore, duke sugjeruar zëvendësime më pak tërheqëse si “disk” ose “tub”.
McCartney deklaroi se mjafton të specifikohet se produktet janë “vegjetariane”, “vegane” ose “bimore”, duke e bërë të qartë për konsumatorët për çfarë po flitet, ndërsa kjo ndihmon edhe në promovimin e shëndetit personal dhe mjedisor.
McCartney tha: “Të përcaktosh që hamburgerët dhe salçiçet janë ‘me bazë bimore’, ‘vegjetariane’ ose ‘vegane’ duhet të jetë e mjaftueshme që njerëzit e arsyeshëm të kuptojnë se çfarë po hanë. Kjo gjithashtu inkurajon qëndrime që janë thelbësore për shëndetin tonë dhe atë të planetit.”
Muzikanti dhe familja e tij, të cilët themeluan markën Linda McCartney për ushqimet bimore në vitin 1991 dhe sëbashku me vajzat e tyre nisën fushatën globale “Meat Free Monday” (apo “E hëna pa mish”), shprehen se rregullat e BE-së mund të ndikojnë edhe në Mbretërinë e Bashkuar, për shkak të lidhjeve të tregut dhe rregulloreve mes vendeve.
Vendimi i Parlamentit Evropian ka nxitur reagime të ashpra nga industritë e bujqësisë dhe mishit, të cilat frikësohen se ulja e kërkesës për produktet e mishit mund të ndikojë në vendet e punës. Përballë kësaj, McCartney dhe tetë deputetët britanikë që nënshkruan letrën, përfshirë Jeremy Corbyn dhe ish-liderët e Partisë së Gjelbër Carla Denyer dhe Adrian Ramsay, kërkojnë që BE-ja të rishqyrtojë vendimin dhe të lejojë përdorimin e termave tradicionale për produktet bimore.
Ky debat ka krijuar një jehonë ndërkombëtare, duke rikthyer në vëmendje çështjen e balancës mes inovacionit ushqimor, traditës dhe lirisë së konsumatorit.