Opozita shqiptare, ndonëse pas 13 viteve humbjesh, vijon të endet në një realitet paralel. Pasi kryetari i PD-së Sali Berisha tha disa ditë më parë se mund të bëhet kryeministër në vitin 2040, deputeti Belind Këlliçi tha gjatë një interviste në televizionin e Familjes Berisha, se në mbledhjen e nesërme të Kuvendit Kombëtar të PD-së do të shpaloset programi qeverisës.
Këlliçi foli edhe për fytyrën e re të PD-së, fytyrë e cilat do përbëhet nga riciklimi i fytyrave të Sali Berishës, Flamur Nokës, Albana Vokshit etj.
“Ditën e nesërme mbyllet kapitulli i provës kush është opozita dhe kush PD-ja. Nesër drejtuesit e PD-së dhe kryetari Sali Berisha kanë për detyrë të shpalosin programin qeverisës të PD-së dhe të bëjnë me dije qytetarëve se kush është ekipi dhe fytyra e PD si një alternativë shumë herë më e mirë dhe më e besueshme se ajo që është në qeverisje. Nesër qytetarët janë të etur të dinë se ku qëndron PD për të ardhmen.
Nesër procesi do të konkludohet me votimin për anëtarët e rinjt të Këshillit Kombëtar që si asnjëherë më parë ky numër ka shkuar në 200. Është shtuar numri i zonjave dhe zonjushave, është shtuar dhe numri i diasporës në Këshill Kombëtar.
Ky rezultat dhe ky produkt do të jetë konkret të dielën në mbrëmje, pasi votat duan kohë të numërohen. Më pas brenda një javë do të bëhen zgjedhje për ekipin drejtues të PD-së, kryesia, nbënkryetarët, sekretariatët, që bashkë me zotin Berisha do na udhëheqin në betejën politike duke nisur nga zgjedhjet e ardhshme. Beteja jonë për zgjedhje të ndërshme dhe qeveri teknike nuk ndërron”, tha Këlliçi.
