Partia Socialiste kremtoi sot 35-vjetorin e themelimit në një aktivitet të zhvilluar në Pallatin e Kongreseve, ku Edi Rama zgjodhi të rikthejë në skenë “gardën e vjetër” të socialistëve, figurat që kanë qenë pjesë e themelimit dhe viteve të para të PS-së.
Ceremonia vjen në një moment jo të lehtë për socialistët. Brenda partisë janë shtuar sinjalet e pakënaqësisë, me Elisa Spiropalin që ka dalë hapur kundër disa zhvillimeve, Erion Braçen që ka shtuar kritikat dhe ka shfaqur ambicie për Tiranën, ndërsa në bazë ka zëra që ankohen për mungesë vëmendjeje dhe për mënyrën si funksionon partia pas kaq vitesh në pushtet.
Pikërisht në këtë atmosferë, Rama u kujdes të dërgonte edhe një mesazh të qartë për socialistët që e shohin partinë si instrument për favore personale.
“Një gjë dua t’ju them të gjithë atyre socialistëve që në emër të punës që bëjnë, kërkojnë favore, që për atë që kanë bërë, partia duhet t’u rregullojë dhëndrin në punë. Cili hero i Luftës Nacionalçlirimtare do ta kërkonte këtë favor në emër të gjakut të tij?”, tha Rama.
Në aktivitet u vlerësuan me medalje ari disa prej figurave historike të Partisë Socialiste, mes tyre ish-presidenti Rexhep Mejdani, kryetari i parë i grupit parlamentar të PS-së Namik Dokle, ish-kryeministri Ylli Bufi, ish-kryetarët e PS-së në Tiranë Musa Ulqini, Halil Lalaj dhe Besnik Baraj, si dhe ish-deputetë e themelues si Valentina Leskaj, Anastas Angjeli, Hamdi Jupe, Maqo Lakrori, Luan Shaullari dhe Sajmira Pino.
Rexhep Mejdani u nderua për kontributin e tij në zhvillimin e demokracisë dhe rolin si president, ndërsa në fjalën e tij uroi që PS ta çojë Shqipërinë drejt modeleve sociale europiane. Ethem Ruka, ish-deputet dhe ish-ministër, u vlerësua për kontributin në themelimin e PS-së, duke kujtuar emocionet e viteve të para të partisë.
Namik Dokle, kryetari i parë i grupit parlamentar socialist, tha se PS u themelua me idealizëm dhe se thelbi i saj mbetet “progresi dhe solidariteti”. Ylli Bufi u vlerësua për rolin në tranzicion dhe stabilizimin institucional të vitit 1991, ndërsa Valentina Leskaj u nderua si një nga figurat më të rëndësishme të grave në politikën shqiptare.
Me medalje ari u vlerësuan gjithashtu Besnik Baraj, Hamdi Jupe, Anastas Anxheli, Maqo Lakrori, Halil Lalaj, Musa Ulqini, Luan Shaullari dhe Sajmira Pino, të cilët në fjalët e tyre rikujtuan vitet e para të PS-së, betejat politike dhe rolin e socialistëve në transformimin e vendit.
Rikthimi i figurave të vjetra në skenën e PS-së duket si një tentativë e Ramës për të dhënë mesazh uniteti dhe vazhdimësie në një moment kur partia po përballet me tensione të brendshme, pakënaqësi në bazë dhe dilema për drejtimin e saj në vitet e ardhshme.