Së fundmi ish-banorja e Big Brother Vip Albania 5, Edisa Demollari ka bërë një rrëfim tepër të dhumbshëm, ku ka sjellë në vëmendje një realitet që shumë gra e përjetojnë në heshtje, presionin për t’u bërë nënë dhe plagët që lë pas një rrugëtim i vështirë drejt prindërimit.
Ajo ka treguar hapur se martesa e saj përfundoi pikërisht për shkak të kësaj ëndrre të parealizuar. “Arsyeja e ndarjes është sepse donim të kishim një fëmijë. Tentuam shumë për vite me radhë, por nuk ndodhi. Kjo solli shumë zënka në çift derisa përfunduam në ndarje”, rrëfen Edisa.
Mes emocioneve, ajo kujton momentet më të vështira, ato të zhgënjimit të përsëritur. “Ato lot që kam derdhur kur bëja testet dhe dilnin negative… askush nga ne nuk kishte probleme, por fëmija nuk po vinte. Ishte shumë e dhimbshme”, shprehet ajo, duke treguar se si një situatë e pashpjegueshme mund të rëndojë një marrëdhënie deri në pikën e thyerjes.
Sot, Edisa nuk e ka humbur shpresën për të ardhmen dhe beson se gjithçka mund të ndryshojë në momentin e duhur. “Shpresoj që sapo të gjej njeriun e duhur, fëmija të vijë sa më shpejt”, thotë ajo, duke lënë të kuptohet se dëshira për t’u bërë nënë mbetet e fortë.
Por përtej historisë së saj personale, mesazhi më i fortë i Edisës është një thirrje për ndjeshmëri dhe mirëkuptim nga publiku. “I lutem shumë shikuesve, komentuesve… kemi një orë biologjike që na bën tik-tak dhe na ka vënë një kufizim shumë të madh. Sa më shumë vite të kalojnë, aq më e vështirë bëhet. Mos na vendosni edhe ju kufinj se kur duhet të bëhemi nënë”, apelon ajo.
Në fund, ajo prek një nga paragjykimet më të forta që ende ekzistojnë në shoqëri. “Është e dhimbshme për një femër që t’i thuash se nuk je e suksesshme sepse nuk je nënë”, përfundon Edisa, duke ngritur një debat që shkon përtej një historie personale dhe prek mijëra gra që përballen me të njëjtin realitet.
