Daniel Cohn-Bendit, ish-lideri legjendar i protestave të ’68-s në Francë dhe një nga figurat më të njohura të të Gjelbërve europianë, lëshon një alarm të fortë. Trump dhe Putin po punojnë për të shkatërruar Europën, ndërsa kontinenti rrezikon të bjerë në një rend “joliberal” larg demokracisë, thotë ai.
Sipas tij, presidenti amerikan është “i çmendur”, ndërsa politika e Shtëpisë së Bardhë po synon të shndërrojë Europën në një “protektorat pa liri”. Për këtë arsye, BE-ja duhet të reagojë me urgjencë, duke nisur nga krijimi i një Unioni të Mbrojtjes, duke ecur drejt një strukture federale dhe duke mbrojtur Ukrainën.
I pyetur për doktrinën e re të politikës së jashtme amerikane, që Kremlini pretendon se e pasqyron edhe ai, Cohn-Bendit thotë se të dyja këto vende kanë të njëjtin objektiv.
“Europa duhet ta kuptojë. Italia duhet ta kuptojë se rregullat e lojës kanë ndryshuar plotësisht”, tha ai.
Ai shpjegon se imperializmi amerikan i së kaluarës ishte i lidhur me Aleancën Transatlantike, ndërsa sot vizioni trumpist është kundër Europës, duke kërkuar aleancë me Rusinë dhe duke e parë BE-në si rival ekonomik dhe politik.
Cohn-Bendit e përshkruan Trump-in si një lider joliberal dhe autoritar.
“Nuk dua të përdor fjalën ‘fashist’, por Trump shkon drejt një forme totalitarizmi”, tha ai.
Ai shton se zgjedhja e tij është pasojë e një shoqërie që kërkon zgjidhje të thjeshta për probleme të ndërlikuara, veçanërisht pas pandemisë, e cila “çliroi emocionet negative”.
Për të, marrëdhënia mes Trump dhe Putin është si pakti Molotov-Ribbentrop.
“Një pakt transversal që rrezikon të zhdukë demokracinë në Europë”, tha Cohn-Bendit.
Ukraina, sipas tij, është vija ndarëse mes demokracisë dhe autoritarizmit.
Ai kërkon që BE-ja të ndërmarrë menjëherë hapa drejt një mbrojtjeje të përbashkët europiane, sepse “Shtetet e Bashkuara kanë një projekt tjetër që nuk përfshin Europën”.
Për të përparuar drejt Unionit të Mbrojtjes dhe një strukture federale, ai thotë se Orban dhe Fico duhen larguar.
“Orbán, Fico dhe të tjerët duhen larguar. Të gjithë duhet të zgjedhin mes jetës dhe vdekjes së Europës. Nuk mund të pranojmë kalin e Trojës të Putin-it dhe Trump-it brenda BE-së”, tha ai.
Cohn-Bendit nën një paralajmërim në rast të një humbje të demokracisë liberale në Europë.
“Do të thotë të bëhemi një protektorat i Trump-it ose i Putin-it. Rrezikohet gjithçka që ndërtuam që prej çlirimit të vitit 1945”, tha ai.
Ai pranon se reputacioni global i Europës është zbehur, por beson se projekti europian mbetet unik.
“Vendet që bashkohen pa luftë – është e jashtëzakonshme. Ende mund të jemi model. Shpresoj që historianët të thonë: Europa fitoi kundër botës së së keqes, SHBA-ve, Rusisë dhe Kinës”, tha ai.
Sipas tij, kjo kërkon liderë të fortë, intelektualë më aktivë dhe një mobilizim të shoqërisë europiane për të mbrojtur demokracinë.