Kryeministri Edi Rama, gjatë fjalës së tij në aktivitetin “Me fermerët në Shqipërinë 2030”, tha se një nga sfidat më të mëdha të integrimit në BE mbetet bujqësia.
Ai tha se në marrëveshjet me BE ka dy anë të medaljes: ana e errët, ku do të gjenden ata që nuk janë të përgatitur, dhe ana e ndritur, për të gjithë ata që do të jenë më të përgatitur.
“Pas një takimi shumë të veçantë në Elbasan, jemi këtu për një tjetër takim, këtë herë për një takim pune të organizuar nga Ministria e Bujqësisë me disa nga protagonistët kryesorë të fermës shqiptare, për të folur për planin e veprimit dhe domosdoshmërinë e ndërveprimit mes nesh, në mënyrë që bujqësia të përballojë sfidën e tregut europian në kontekstin e Shqipërisë si anëtare e BE.
Dua të flas shumë hapur me ju, duke ju thënë që kjo sfidë ka dy anë: ka anën e errët, nëse mund ta quaj kështu, dhe anën e ndritur. Ana e errët është ajo që pret çdo fermer që nuk është i përgatitur për atë ditë, sepse negociatat me BE dhe marrëveshja e anëtarësimit nuk janë thjesht fjalë apo procese të lidhura me atë që shkruajmë në letër, por janë kontrata shtetërore shumë komplekse, ku çdo faktor duhet t’i përgjigjet kontratës.
Kontrata për bujqësinë është më e vështira, siç ka treguar eksperienca e vendeve të tjera, por njëkohësisht është edhe më e mirëpritur për ata që janë të përgatitur për të përballuar standardet dhe kontrollet që burojnë nga cilësia shumë e lartë dhe siguria e produkteve, kur vjen puna për të qenë lojtar në tregun e BE”, tha Rama.