Vajza e ish-presidentit të Afrikës së Jugut, Jacob Zuma, ka dhënë dorëheqjen si deputete pas akuzave se kishte mashtruar 17 burra për të luftuar si mercenarë për Rusinë në Ukrainë.
Duduzile Zuma-Sambudla, e cila u bë anëtare e parlamentit vitin e kaluar për partinë kryesore të opozitës uMkhonto weSizwe (MK), ka deklaruar se ajo mendonte që burrat po shkonin në Rusi për trajnim “të ligjshëm”.
Partia MK tha se dorëheqja ishte vendim i saj, pasi Duduzile Zuma-Sambudla dëshiron të përqendrojë përpjekjet për kthimin e atyre që janë të bllokuar në rajonin e shkatërruar nga lufta në Donbas të Ukrainës.
Vëllai i njërit prej burrave, i cili ka dërguar mesazhe zanore të dëshpëruara për gjendjen e tij, i tha BBC-së se familja kërkon përgjegjësi dhe kthimin e tij të sigurt.
“Gjërat që i sheh në filma, ne po i shohim drejtpërdrejt,” tha 40-vjeçari në një prej mesazheve të ndara me BBC-në nga familja e tij, për tmerret që po përjetonin në Ukrainë.
Transmetuesi publik britanik nuk e ka zbuluar identitetin e tij për arsye sigurie, duke e quajtur Sipho, ndërsa vëllain e tij, që ndodhet në Afrikën e Jugut, Xolani.
“Jeton me frikë sepse nuk e di çfarë e pret, apo çfarë do t’i ndodhë kur bie nata, pasi ata janë gjithmonë në zonë lufte,” tha Xolani për të vëllanë, duke shtuar se dorëheqja e Zuma-Sambudla, e cila ka babanë lider të MK-së, nuk ka asnjë kuptim për familjen.
“Ajo thjesht po përpiqet të shpëtojë reputacionin e partisë politike të të atit… Familjet duan përgjegjësi dhe kthimin e burrave që u mashtruan për të luftuar për Rusinë.”
Sipho thotë se ishte rekrutuar nga dy persona, njëri prej tyre Zuma-Sambudla.
“Ata (e ka fjalën për rekrutuesit) madje na blenë biletat e avionit për të ardhur këtu (në Rusi),” thotë Sipho në një prej mesazheve. Zuma-Sambudla ka mohuar se ka mashtruar dikë me qëllim dhe thotë se është “thellësisht e tronditur”, duke shtuar se edhe vetë është viktimë e mashtrimit dhe manipulimit.
Xolani thotë se vëllai i tij u largua nga Afrika e Jugut më 8 korrik, duke menduar se do të trajnohej si truprojë për MK-në. Por i ndodhi krejt e kundërta.
Në deklaratën e saj, Zuma-Sambudla thotë se ajo vetë kishte marrë trajnim joluftarak në Rusi, të organizuar nga një burrë që ajo thotë se nuk e njihte derisa e kontaktoi. Kur ai sugjeroi rekrutimin e më shumë njerëzve për të marrë pjesë në atë që ajo mendonte se ishte program i ngjashëm, Zuma-Sambudla “e shpërndau informacionin në mënyrë të pafajshme” me të tjerë, përfshirë familjarë.
“Nuk do t’i ekspozoja në asnjë rrethanë familjarët e mi, apo këdo tjetër, ndaj rrezikut,” shton ajo.
Zbulimi se njerëzit ishin mashtruar për t’u dërguar në luftë i ka “shkaktuar tronditje dhe shqetësim të thellë,” thotë Zuma-Sambudla. “Edhe unë jam viktimë e mashtrimit, keqinterpretimit dhe manipulimit,” shton ajo në deklaratë.
Më herët këtë muaj, qeveria e Afrikës së Jugut konfirmoi se kishte marrë thirrje urgjente nga 17 shtetas të saj të bllokuar në Donbas, të cilët ishin joshur të bashkoheshin me forca mercenare në këmbim të kontratave fitimprurëse. Qeveria e Afrikës së Jugut nuk ka dhënë asnjë informacion të ri që prej deklaratës së saj të fundit. Ajo kishte premtuar se do të përdorte “kanalet diplomatike” për t’i kthyer këta burra në atdhe, por ende nuk ka bërë diçka konkrete.