Një 38-vjeçar në Vlorë ka rënë në prangat e policisë, pasi është konstatuar se fshihte lëndë narkotike në magazinën e lokalit të tij.
Sipas asaj që bëhet e ditur është sekuestruar një sasi kanabisi dhe kokaine.
“Vijojnë kontrollet në qarkun Vlorë, goditet një tjetër rast në fushën e narkotikëve, falë inteligjencës policore. Fshihte lëndët narkotike në magazinën e lokalit, dhe i ndante në doza për shitje, vihet në pranga 38-vjeçari. Sekuestrohet një sasi kanabisi dhe kokaine.
Seksioni për Hetimin e Narkotikëve në DVP Vlorë, në kuadër të veprimeve operacionale për evidentimin dhe goditjen e veprimtarive kriminale në fushën e narkotikëve, pas administrimit të menjëhershëm të informacioneve të siguruara nga inteligjenca policore, se një shtetas posedonte lëndë narkotike me qëllim shitjen, organizoi dhe kreu kontrolle në një ambient që shërbente si magazinë, pranë lokalit në administrim të tij, si dhe në banesën e tij.
Si rezultat, u kap dhe u arrestua në flagrancë shtetasi E. Ll., 38 vjeç, banues në Vlorë. Gjatë kontrolleve në magazinën dhe banesën e tij, shërbimet e Policisë gjetën dhe sekuestruan një sasi me lëndë narkotike kanabis dhe kokaine, të cilat ky shtetas dyshohet se i ndante më pas në doza me qëllim shitjen e tyre”, njofton Policia.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Vlorë, për veprën penale “Prodhimi dhe shitja e narkotikëve”.