Gazetari Mentor Nazarko rikujtoi se Benjamin Natanyahu ka pritur 102 refugjatë kosovarë në vitin 1999 dhe ka kërcënuar Sllobodan Millosheviçin.
“Do duhet të përmendim për të gjithë ata që e shohin me dyshim, faktin që me gjithë atë çfarë ka ndodhur përkundrejt popullit të Gazës, Netanyahu ishte ai që priti 102 refugjatë kosovarë në vitin 1999 dhe është ai që ka kërcënuar Millosheviçin në 23 dhjetor 1999. I ftuar nga Jaser Arafati për Krishtlindje në Betlehem, i ka thënë: “Nëqoftëse vjen, do të dorëzojmë në Gjykatën e Hagës”. Është lobi hebre që ka përcaktuar çlirimin e Kosovës dhe është Netanyahu që ia dha njohjen Kosovës kur disa vende arabe nuk kanë dashur t’ia japin”, u shpreh Nazarko në studion e “Off the Record” nga Andrea Danglli, në A2CNN.
Sipas gazetarit, “Izraelin duhet ta kemi në krahun tonë sepse është nga shtetet më të fuqishme dhe më me ndikim në botë”.
“Ne po flasim për respektin për një komb i cili ka qenë afër nesh, të cilin nuk duhet t’ia lëmë grekëve dhe nuk duhet t’ia lëmë armiqve tanë, serbëve. Pra, duhet ta kemi në krahun tonë sepse është nga shtetet më të fuqishme, më me ndikim në botë, që përgjon gjithë botën, që ka sekretet e gjithë botës dhe duhet ta kemi në krahun tonë. Sa i përket Vlorës, është një qytet i cili ka në historinë e vet të Mesjetës, ka qytetërim hebre dhe është zgjedhur vetëm Vlora si simbol dhe në gjykimin tim është një zgjidhje tërësisht normale. Ata që e kundërshtojnë frymëzohen o nga puritanizëm ideologjik, o nga puritanizëm sovranist ose nga axhenda të tjera antisemite të cilët i frymëzojnë shtete të tjera, të cilët disa prej tyre janë dhe aleatët tan. Kështu që, në gjykimin tim nuk ka asnjë lloj sakrilegji. Po të shikoni, edhe opozita nuk po e kundërshton një gjë të tillë. Madje, as vetë protestuesit nuk kanë kundërshtim”, shtoi Nazarko.
Burimi: Politika