Drejtori i përkohshëm i përgjithshëm i Komisionit Qendror të Zgjedhjeve, Dean Livneh, hodhi poshtë sot akuzat për vjedhje votash në zgjedhjet izraelite, duke deklaruar se nuk ka prova që sugjerojnë se votuesit arabë “vodhën” zgjedhjet parlamentare.
Partitë arabe, Ra’am dhe Fletëvotimi i Përbashkët, surprizuan duke arritur rezultate shumë më të mira se sa pritej, duke siguruar gjithsej 19 vende, sipas rezultateve të përkohshme.
Partia e krahut të djathtë Likud e kryeministrit izraelit Benjamin Netanyahu akuzoi partitë arabe për mashtrim zgjedhor, duke pretenduar se zgjedhjet u “vodhën nga partitë arabe që mbështesin terrorizmin dhe shkatërrimin e shtetit hebre”.
Ministri i Sigurisë Kombëtare Itamar Ben-Gvir, një figurë kryesore e së djathtës ekstreme dhe pjesë e bllokut të Netanyahut, bëri thirrje për arrestimin e udhëheqësve të partive arabe, të cilët janë shënjestër e akuzave se mbështeten nga jashtë.
Livneh i tha transmetuesit publik Kan se nuk kishte asnjë tregues që partitë arabe siguruan vota në mënyrë të paligjshme.
Një zyrtar i lartë i policisë i përshkroi gjithashtu akuzat si taktika propagande, të zhveshura nga çdo bazë faktike. Duke folur për gazetën Haaretz, ai theksoi se ankesat për parregullsi gjatë procesit zgjedhor ishin më të pakta se në zgjedhjet e mëparshme.
Komisioneri i Policisë Daniel Levy tha më vonë se çdo ankesë e marrë në lidhje me zgjedhjet do të hetohet plotësisht dhe në mënyrë të paanshme. Nëse ka dyshime për vepra penale, policia do të veprojë me vendosmëri për të zbuluar të vërtetën dhe për të sjellë para drejtësisë ata që janë të përfshirë, theksoi ai.
Nga ana e tij, Presidenti izraelit Isaac Herzog bëri thirrje sot që i gjithë komuniteti arab izraelit të mos stigmatizohet.
“Arsyet e dyshimit duhet të hetohen”, por “nuk duhet të shpifim një komunitet të tërë që ushtroi të drejtën e tij për të votuar”, tha presidenti në një deklaratë.
Mansour Abbas, kreu i Raam, i hodhi poshtë përsëri akuzat kundër pakicës arabe për mashtrim zgjedhor.
Nuk ka asgjë në lidhje me këtë,” tha Abbas, sipas një deklarate të dërguar AFP-së nga zëdhënësi i tij.
“Raam nuk ka absolutisht asnjë lidhje me këtë çështje apo ndonjë çështje tjetër, dhe ne deklarojmë se do të bashkëpunojmë plotësisht me të gjitha autoritetet e zbatimit të ligjit për të përcaktuar të vërtetën”, shtoi ai.
The post KQZ-ja rrëzon akuzat e Netanyahut: Nuk ka prova për vjedhje votash nga partitë arabe appeared first on Euronews Albania.
Burimi: Botë