Udhëheqësit kinezë dhe islandezë ranë dakord të rrisin bashkëpunimin gjatë takimit të tyre të martën në Pekin.
Presidenti kinez Xi Jinping tha se rezultatet e frytshme dypalëshe tregojnë se vendet me sisteme të ndryshme shoqërore mund të kapërcejnë dallimet për të arritur përfitim të ndërsjellë.
Xi u bëri thirrje të dy vendeve të thellojnë bashkëpunimin praktik në fusha si ekonomia, tregtia, energjia gjeotermale dhe të tjera. Sipas tij, dy vendet gjithashtu duhet të punojnë së bashku për të çuar përpara transformimin e gjelbër dhe për të përballuar ndryshimet klimatike, duke forcuar shkëmbimet njerëzore dhe kulturore në fusha turistike, arsimore për të rritur miqësinë dhe mirëkuptimin e ndërsjellë.
Duke vënë në dukje se Kina dhe Islanda mbështesin multilateralizmin dhe sistemin ndërkombëtar me Kombet e Bashkuara në qendër si dhe rendin ndërkombëtar të bazuar në ligj ndërkombëtar, Xi tha se të dy palët duhet të mbajnë komunikim të ngushtë, të angazhohen së bashku për zgjidhjen e mosmarrëveshjeve ndërkombëtare përmes dialogut dhe konsultimit dhe të promovojnë ndërtimin e një sistemi më të drejtë dhe të barabartë të qeverisjes globale.
Xi gjithashtu u bëri thirrje të dy vendeve të shfrytëzojnë mundësinë e Takimit të Udhëheqësve Globalë për Gratë për të promovuar zhvillimin e vazhdueshëm të kauzave globale të grave.
Presidentja islandeze Halla Tomasdottir uroi Kinën për organizimin e suksesshëm të takimit të kësaj here. Duke vlerësuar kontributet e rëndësishme të Kinës në avancimin e kauzave globale të grave, Tomasdottir tha se Islanda është e gatshme të forcojë komunikimin dhe bashkëpunimin me Kinën për të promovuar zhvillimin gjithëpërfshirës të grave në mbarë botën.
Tomasdottir theksoi se miqësia afatgjatë midis Islandës dhe Kinës ka nxitur një marrëdhënie të fortë dhe të fuqishme dypalëshe me bashkëpunim të frytshëm në fusha si tregtia, energjia gjeotermale dhe turizmi.
Islanda i kushton rëndësi të madhe marrëdhënieve të saj me Kinën dhe është e përkushtuar për të zgjeruar më tej fushën e bashkëpunimit dhe për të rritur shkëmbimet njerëzore për të arritur një përparim edhe më të madh reciproik, shtoi presidentja islandeze.
Duke vënë në dukje se para një bote të trazuar dhe të pasigurt, Kina ka demonstruar lidership në adresimin e sfidave globale, Tomasdottir tha se Islanda është e gatshme të forcojë komunikimin dhe koordinimin me Kinën për t’u përballur së bashku me këto sfida globale.