Mbledhja e këshilltarëve të majtë të Bashkisë së Tiranës, në selinë e PS, ka përfunduar rreth orës 18:30, me socialistët që kanë vendosur të shtyjnë përpara kërkesën për shkarkimin e kryebashkiakut Erion Veliaj, i cili prej 7 muajsh ndodhet në paraburgim.
Burime nga mbledhje për A2 CNN bëjnë me dije se këshilltarëve bashkiakë u është kërkuar shkarkimi i kryebashkiakut Erion Veliaj me argumentin se mungon prej 3 muajsh në detyrë. Burimet sqarojnë më tej se kërkesa për shkarkimin e Veliajt përmban pak a shumë pjesë nga fjala e kryeministrit Edi Rama në Asamblenë e PS, ku i hapi rrugë zgjedhjeve të pjesshme për kryeqytetin, duke ia besuar këtë garë, ish-ministres së Arsimit Ogerta Manastirliu.
A2 CNN mëson se rezistencë për të firmosur kërkesën ka bërë këshilltari Aldo Mërkoçi edhe pse në fund ka hedhur firmën së bashku me të gjithë kolegët e tij. Ai ka kërkuar që në deklaratë të shënohet se Veliaj i ka shërbyer qytetit dhe fjalë të tjera për punën e tij të mirë dhe kërkesa i është marrë parasysh.
Po ashtu është vendosur që të martën e ardhshme, në orën 16:00, të zhvillohet mbledhja e Këshillit Bashkiak të Tiranës, për të marrë vendimin.