Tiranë – Policia e kryeqytetit ka finalizuar me sukses operacionin policor të koduar “Këmbimi”, duke identifikuar dhe ndaluar 4 autorë të dyshuar të përfshirë në raste të rënda kanosjeje dhe heqjeje të paligjshme të lirisë, me qëllim përfitimin e pasurisë.
Sipas njoftimit zyrtar nga Policia e Tiranës, rasti i parë ka të bëjë me shantazh ndaj një 21-vjeçari, i cili është kërcënuar për publikimin e një videoje komprometuese në rrjete sociale.
Autori, një 18-vjeçar me inicialet J. B., u kap në flagrancë teksa i merrte viktimës shumën prej 5000 euro, ndërsa bashkëpunëtori i tij, shtetasi A. Gj., 20 vjeç, është shpallur në kërkim.
“Me cilësinë e provës materiale, u sekuestruan shuma e eurove dhe 3 celularë”, thuhet në njoftimin e Policisë së Tiranës.
Ndërkohë, në rastin e dytë, dy persona – shtetasit S. H., 30 vjeç dhe L. H., 21 vjeç – janë arrestuar pasi dyshohet se i kanë hequr lirinë një të mituri.
Të dyshuarit e kanë mbajtur të miturin në automjetin e tyre, duke e akuzuar për një vjedhje të ndodhur në biznesin e tyre.
“Me cilësinë e provës materiale, u sekuestrua automjeti i përdorur nga të arrestuarit për kryerjen e veprës penale”, njofton Policia e Tiranës.
Policia bën me dije se po punohet për dokumentimin e plotë të të dy rasteve dhe për kapjen e personit ende në kërkim.
Materialet procedurale i janë referuar Prokurorisë së Tiranës për veprime të mëtejshme.