Pas më shumë se katër ditësh kërkimesh, sot është gjetur i pajetë 27-vjeçari Ajet Lleshi, banor i fshatit Kishaj në Has, i cili kishte humbur kontaktet me familjen që prej mëngjesit të 6 prillit.
Lleshi u shpall i humbur pas një dite kur doli për të prerë dru në pyll dhe nuk u kthye më.
Policia ka njoftuar se pa denoncimit nga familjarët, forcat e Policisë filluan menjëherë kërkimet në bashkëpunim me Grupin e Kërkim-Shpëtimit të Kosovës, Policinë Kufitare, Emergjencën Civile, si dhe banorët e zonës dhe familjarët e të riut. Kërkimet u fokusuan në terrenin e vështirë malor mes fshatrave Kishaj dhe Cahan.
Si rezultat i këtyre përpjekjeve, trupi i Ajet Lleshit u gjet pa shenja jete në një zonë të pyllëzuar. Grupi hetimor nën drejtimin e Prokurorisë ka filluar punën për të përcaktuar shkakun e humbjes së jetës së tij dhe për të dokumentuar ligjërisht rastin.
Njoftimi i policisë:
Në vijim të informacionit të dhënë më datë
07.04.2025, për humbjen e kontakteve të shtetasit A.Ll., 27 vjeç me familjaret e tij, ju informojmë se:
Si rezultat i kërkimeve të pandërprera të kryera nga Shërbimet e Policisë në bashkëpunim me Grupin e Kërkim-Shpëtimit të ardhur nga Kosova, Policinë Kufitare, Emergjencën Civile, banorët e zonës dhe familjarët e 27 vjeçarit, është bërë e mundur gjetja e trupit të pajetë të 27 vjeçarit, në një zonë të pyllëzuar malore mes fshatrave Kishaj dhe Cahan.
Grupi hetimor nën drejtimin e Prokurorisë vijon punën për përcaktimin e shkakut të humbjes së jetës së 27 vjeçarit dhe dokumentimit ligjor të rastit.