Teksa Sali Berisha garon i vetëm për kreun e Partisë Demokratike, selia blu ka pranuar për herë të parë se partia është përgjysmuar në anëtarësi. Por krahas rënies drastike të demokratëve, pikëpyetje të forta janë ngritur edhe mbi pjesëmarrjen reale në votime.
Zgjedhjet e kësaj të shtune në Partinë Demokratike po zhvillohen pa garë dhe mes akuzave për farsë, ndërsa procesi ka nxjerrë në pah krizën më të thellë të demokratëve në më shumë se një dekadë.
Për herë të parë, vetë Partia Demokratike pranoi zyrtarisht se ka rreth 50 mijë anëtarë, një shifër që tregon tkurrjen dramatike të partisë që dikur numëronte mbi 100 mijë demokratë.
Në vitin 2013, pas largimit të Berishës nga pushteti, në garën Basha-Olldashi PD kishte rreth 100 mijë anëtarë. E njëjta shifër u ruajt edhe në vitin 2017, kur Lulzim Basha u përball me Eduard Selamin.
Rënia nisi pas humbjeve elektorale dhe përçarjeve të brendshme. Në vitin 2021, pas humbjes ndaj Edi Ramës, PD zbriti në 75 mijë anëtarë.
Por “Rithemelimi”, që Berisha e paraqiti si rikthimin e demokratëve në parti pas shpalljes “non grata”, duket se prodhoi efektin e kundërt. Vetëm në pesë vitet e fundit, PD ka humbur ose larguar rreth 25 mijë anëtarë të tjerë, ndërsa figura historike dhe mbështetës të njohur janë distancuar nga partia.
Edhe procesi i sotëm po shoqërohet me dyshime të forta mbi pjesëmarrjen reale. Në vitin 2022, kur Berisha garoi përballë Ibsen Elezit, Rithemelimi nuk publikoi asnjëherë numrin total të anëtarësisë, ndërsa deklaroi se kishin votuar rreth 46 mijë demokratë dhe Berisha kishte marrë mbi 43 mijë vota.
Këtë herë, me Berishën kandidat të vetëm, selia blu publikoi për herë të parë shifrën prej 50 mijë anëtarësh, por kritikët brenda PD pretendojnë se kjo është një mënyrë për të ulur artificialisht bazën dhe për të fshehur rënien e pjesëmarrjes.
Sipas Komisionit Zgjedhor të PD-së, deri në orën 15:00 kishin votuar 28 mijë e 379 anëtarë në 77 degë të partisë. Megjithatë, zëra kritikë brenda demokratëve pretendojnë se shifrat nuk përputhen me realitetin në terren dhe kanë paralajmëruar publikimin e pamjeve filmike nga qendrat e votimit.
Në një proces ku Sali Berisha garon pa rivalë, zgjedhjet në PD po shoqërohen jo vetëm me mungesë gare, por edhe me hijen e dyshimeve mbi pjesëmarrjen dhe krizën e thellë që ka përfshirë partinë më të madhe opozitare në vend.
