Deputetja demokrate Ina Zhupa dhe Ministri i Turizmit, Kulturës dhe Sportit, Blendi Gonxhja, zhvilluan sot një interpelancë në Kuvend lidhur me projektin TID në qytetin e Durrësit.
Gjatë fjalës së saj, deputetja Ina Zhupa akuzoi qeverinë se po përdor projektin TID si justifikim për të prishur banesa historike dhe për të dëmtuar identitetin e qytetit.
“Projekti TID për Durrësin, është projekti i fshehur nën emrin për përmirësimine turizmit, e në fakt është një projekt për shkatërrimin e trashëgimisë së Durrësit. Qyteti siç ka qenë 3 mijë vjeçar të shkatërrohet, banesat e qytetarëve të cilat janë banesa historike, që kanë edhe tabela jashtë tyre si mure historike, të shkatërrohen. Pse është kjo sjellje pushtuesish në Durrës? Pushtuesit kur shkonin në një qytet digjnin banesat, shkatërronin vendbanimet. Pse keni zgjedhur të jeni pushtues? Si e keni bërë projektin, me cilat kritere keni zgjedhur objektet që duhen prishur? Ky është plani i pushtuesve të Durrësit”, tha Zhupa.
Ministri Blendi Gonxhja kundërshtoi akuzat, duke theksuar se projekti TID është një investim i rëndësishëm për restaurimin dhe rigjallërimin urban të zonës historike të Durrësit.
“I vetmi shqetësim duhet të ishte pse nuk e kemi mbyllur ende punën. Projekti TID është një investim transformues, një nga më të mëdhenjtë në qytet, që i jep Durrësit një tjetër vlerë. Qëllimi është restaurimi i shtëpive tradicionale, shesheve dhe objekteve, si dhe integrimi i amfiteatrit antik në parkun arkeologjik”, tha ministri.
Ai theksoi se projekti është hartuar nga ekspertë shqiptarë dhe italianë, në përputhje me planin rregullues të qytetit dhe me verifikimet e dëmtimeve pas tërmetit.
“Asnjë hap nuk është në kundërshtim me ligjin. Procesi është i mirëmenduar dhe i bazuar në studime të thelluara. Ekipi i ekspertëve ka identifikuar potencialin arkeologjik dhe projekti synon ta mbrojë atë”, shtoi Gonxhja.
