Deputetja e PD-së, Ina Zhupa, i është përgjigjur nënkryetares së Bashkisë së Sarandës, Manjola Nikollos, pasi kjo e fundit kaloi nga PD në pushtetin vendor. Kjo e fundit në një intervistë të dhënë, akuzoi Zhupën për manipulim të procesit të primareve nëpërmjet ndikimit në kryesinë e partisë, shkaqe këto që e detyruan Nikollon të dorëhiqej nga primaret dhe nga drejtimi i degës së PD-së në Sarandë dhe rrjedhimisht largimin nga PD.
Ina Zhupa ka shpërndarë në rrjete sociale statusin e botuar nga Shpëtim Ahmeti, demokrati që drejton sot degën e PD-së në Sarandë. Ahmeti shkruan se ky ‘kalim i ylberit politik’ i Nikollos, i shërbeu asaj për tu bërë kryefjalë në media për 1 ditë dhe për të marrë një rrugë si nënkryetare bashkise.
Ahmeti shkruan se ky lajm nuk ishte aspak çuditës, pasi siç shkruan ai, ra thjeshtë një maskë dhe një e vërtetë doli në shesh.
Demokrati thotë se Manjola Nikollo deri dje ka demaskuar socialistë në Sarandë e më tej të përfshirë në afera e kopera’, por e lodhur nga tundja e flamurit të PD-së, vendosi t’i bashkohej armiqve të dikurshëm.
Postimi i plotë i Shpëtim Ahmetit i shpërndarë dhe nga Ina Zhupa:
SHITEJ SI DEMOKRATE, DERI SA U SHIT TE BASHKIA SOCIALISTE
Dy përfitime i erdhën në një ditë Manjolës me kalimin e “ylberit” politik. Edhe u bë lajm dite në portale e kanale dhe i siguroi vetes një të ardhur të mirë me rrogën e Nënkryetares së Bashkisë.
Por, nëse çudia më e madhe, thonë se zgjat tre ditë, në Sarandë ky lajm mbajti tre orë, pasi nuk i ra askujt si bombë.
Sepse në fakt ra një maskë, nuk ndodhi ndonjë gjë për t’u çuditur.
Ajo kryetare “e opozitës së flaktë” në Sarandë, që për vite me radhë, kishte grisur “maska socialistësh”, duke demaskuar afera e kopera të korruptuarish, shkoi në stanin që prodhon këtë “bulmet”.
Pas një stërmundimi sfilitës duke tundur flamurin me siglën PD, e bindi veten se nuk kishte më kuptim të rrinte pas maskës.
Tundimit për një karrige, një post e një rrogë nuk mund t’i thoshte “jo”, kur ato që kishte shitur me vite te demokratët e Sarandës, ishin një kostum blu, që thjesht mendoi se e hijeshonin.
Por nga momenti që nuk doli e vërtetë ëndrra e saj për një karrige deputeteje me atë kostum, i ra shkurt dhe u iu përgjunj ofertës për një copë Nënkryetareje.
“Nga hiçi, është mirë dhe kaq” i tha vetes, për të mos e humbur shansin.
Tani qëndrimet e saj aq “kritike” e opozitare për vendimmarrjet e fundit të propozuara nga ekzekutivi i Sarandës, lidhur me tjetërsimin e Ecokampusit, me investimet strategjike për fotovoltaiket etj grabitje pronash u ekzekutuan, duke u tretur si kripa në ujë e duke i marrë rrjedha e lumit e vala e detit, bashkë me maskën e çngjyrosur.
Nga nesër ajo do të jetë Shoqja Nënkryetare, me një barrë autoritet.
Për atë nis kështu një epokë e re, ajo e vënies në shërbim të politikave dhe duke u bashkuar me bandat e urryera të grabitjes së pronave dhe për t’iu bashkuar korit të politikave kundër interesave komunitare.
I paudhi sot bëhet Maskara.
Sa për Opozitën, pa një Manjolë femër apo mashkull qoftë, është më e pastër dhe më e qartë në misionin e vet, ashtu si një trup pastrohet nga një plagë.
Si kryetar i PD, dega Sarandë, por i bindur jam që edhe çdo anëtar i dinjitetshëm i saj, distancohemi nga njerëz dhe nga kërcime të tilla fluturake.
Duke njohur mirë shoqërinë e qytetit tim, them me pastërti se kjo pjesë e largimeve të këtij lloji nuk surprizoi fare.
Vetëm se më la të kuptoj se nuk paskësha kuptuar: që këto e këta lëpirës, që zvarriteshin deri dhe Qafë të Muzinës për të pritur liderin demokrat, nuk e kanë për gjë të marrin tani me zvarritje shkallët e pista të pushtetit.
Nuk është rastësi të ngjitësh ato shkallë, por është shprehja, më në fund hapur, e shpërblimit që ke dhënë për shërbimin ndaj pushtetit ne 2 palë zgjedhje.
Demokratët e vërtetë qëndruan përballë tankeve e plumbave te komiteteve të shpëtimit më 1997 e jo të ligështohen përballë këtyre sorrave, bjonde a brune, të ngordhura për 5 para të qelbura të borderove bashkiake.
Garantoj çdo demokratë e qytetarë të Sarandës se zëri opozitar do jetë më i fuqishëm përballë çdo maskarade të pushtetit të bandave me çdo ngjyrë kostumi.
