Këta janë pasagjerët e prekur nga shpërthimi i hantavirusit në bordin e anijes turistike “MV Hondius”, të cilët, mes maskave dhe masave të rrepta të sigurisë, ndaluan për të bërë selfie pak çaste para largimit me avionët e evakuimit drejt vendeve të tyre.
Pamjet vijnë nga Tenerife, ku nisi operacioni ndërkombëtar për riatdhesimin e qindra pasagjerëve dhe anëtarëve të ekuipazhit nga anija e goditur nga virusi vdekjeprurës.
Para se të hipnin në avionin që do t’i kthente në Holandë, pasagjerët nga Gjermania, Belgjika, Greqia dhe Holanda morën kujtimet e fundit nga një ferr, që përjetuan në anijen turistike me mbi 100 persona në bord, kur shpërtheu hantavirusi.
Pasagjerët, të cilët sipas zyrtarëve nuk shfaqnin simptoma të virusit, u transportuan drejt aeroportit të Tenerife-s me autobusë ushtarakë dhe pa kontakt me publikun.
Ndërkohë, ministri francez i Mbrojtjes, Sebastien Lecornu, bëri të ditur se pesë shtetas francezë janë riatdhesuar, ndërsa njëri prej tyre shfaqi simptoma gjatë fluturimit. Sipas tij, të pestë janë vendosur menjëherë në izolim të rreptë dhe po monitorohen nga ekipet mjekësore.
Organizata Botërore e Shëndetësisë ka rekomanduar një karantinë 42-ditore për të gjithë personat që ndodheshin në bord.
Hantavirusi, që zakonisht transmetohet nga brejtësit dhe vetëm në raste të rralla nga personi te personi, u zbulua më 2 maj pas testimit të një shtetasi britanik në gjendje të rëndë. Deri tani raportohen tre viktima të lidhura me shpërthimin në bordin e anijes “MV Hondius”.
Shpërthimi dyshohet se është lidhur me një vendgrumbullim mbeturinash në skajin më jugor të Argjentinës, i njohur për vëzhguesit e zogjve. Virusi përhapet atje nga brejtësit dhe është e rrallë që të kalojë midis njerëzve.
