Drejtori i Përgjithshëm i Policisë së Shtetit, Ilir Proda Hita, po vijon procesin e reformimit dhe riorganizimit të strukturave policore në të gjithë vendin. Në kuadër të kësaj strategjie, këtë të enjte janë firmosur një sërë emërimesh të reja në komisariatet kryesore, me synimin për të rritur eficiencën, përgjegjshmërinë dhe performancën e Policisë së Shtetit.
Burime nga radhët e policisë bëjnë me dije se që prej marrjes së detyrës, Hita ka ndërmarrë plot 65 lëvizje drejtuesish dhe shefash në nivel kombëtar, në atë që konsiderohet si një nga proceset më të gjera të ristrukturimit të viteve të fundit. Ndërkohë edhe sot kanë vijuar ndryshimet.
Një nga lëvizjet më të rëndësishme është emërimi i Feliks Hodës në krye të Komisariatit të Policisë Vlorë. Hoda vjen nga Komisariati Nr. 4 në Tiranë, ku ka mbajtur postin e shefit dhe është konsideruar si një nga drejtuesit me përvojë në strukturat e rendit.
Në vend të tij në Komisariatin Nr. 4 është emëruar Florent Sulçe, i cili më parë ka mbajtur detyrën e zëvendësshefit në të njëjtin komisariat, duke siguruar vazhdimësi në drejtimin e një prej strukturave më të rëndësishme të policisë në kryeqytet.
Ndryshimet e fundit prekin një numër të madh komisariatesh në vend. Bilal Selmanaj është emëruar në krye të Komisariatit të Dibrës, Elton Shahini në Krujë, Sentiljan Ndreu në Laç, Arben Sulaj në Lezhë, Elvis Peza në Mirditë, Oltion Gjoni në Mat, Emiljan Pashaj në Korçë, Ergys Gjoni në Bulqizë, Andi Deda në Shijak dhe Ervin Hasrama në krye të Komisariatit Nr. 1 në Tiranë.
Lëvizjet shihen si pjesë e një reforme më të gjerë që synon të freskojë drejtimin e strukturave policore dhe të vendosë drejtues të rinj në zonat me peshë të veçantë për rendin dhe sigurinë publike. Burime pranë Policisë së Shtetit bëjnë me dije se procesi është bazuar në vlerësimin e performancës dhe nevojën për të rritur efektivitetin e strukturave vendore.
Që prej ardhjes në krye të Policisë së Shtetit, Hita ka sinjalizuar se prioritet do të jetë forcimi i disiplinës, rritja e rezultateve në terren dhe përmirësimi i menaxhimit të strukturave policore. Ndryshimet e fundit konsiderohen si një tjetër hap në këtë drejtim, ndërsa pritet që riorganizimi të vijojë edhe në nivele të tjera të administrimit policor.
Me 65 lëvizje drejtuesish në pak muaj, kreu i Policisë po jep sinjale të qarta se synon të lërë gjurmën e tij në reformimin e institucionit, duke kërkuar më shumë dinamizëm dhe përgjegjësi në çdo nivel të strukturës së rendit.
Lëvizjet e fundit
1. Bilal Selmanaj – Shef i Komisariatit të Dibrës
2. Elton Shahini – Shef i Komisariatit të Krujës
3. Sentiljan Ndreu – Shef i Komisariatit të Laçit
4. Florent Sulçe – Shef i Komisariatit Nr. 4, Tiranë
5. Feliks Hoda – Shef i Komisariatit të Vlorës
6. Arben Sulaj – Shef i Komisariatit të Lezhës
7. Elvis Peza – Shef i Komisariatit të Mirditës
8. Oltion Gjoni – Shef i Komisariatit të Matit
9. Emiljan Pashaj – Shef i Komisariatit të Korçës
10. Ergys Gjoni – Shef i Komisariatit të Bulqizës
11. Andi Deda – Shef i Komisariatit të Shijakut
12. Ervin Hasrama – Shef i Komisariatit Nr. 1, Tiranë
