Katër persona janë arrestuar në Korenë e Jugut për hakerimin e 120 mijë kamerave nëpër shtëpi e biznese, pamjet e të cilave janë përdorur për të prodhuar materiale seksuale për një faqe interneti.
Ditën e diel policia njoftoi arrestimet dhe tha se të akuzuar shfrytëzuan pikat e dobëta të IP-ve të kamerave si fjalëkalimet e thjeshta.
Kamerat IP janë më të lira se ÇTV dhe njihen si kamerat e shtëpive. Ato lidhen me linjën e internetit në shtëpi dhe shpesh instalohen për siguri ose për të monitoruar sigurinë e fëmijëve apo kafshëve shtëpiake.
Vendet ku ishin vendosur kamerat e hakeruara përfshinin shtëpi private, dhoma karaokesh, një studio pilatesi dhe një klinikë gjineokologjike.
Në deklaratën e Agjencisë Kombëtare të Policisë, thuhet se katër të arrestuarit vepronin në mënyrë të pavarur nga njëri-tjetri dhe nuk u dekonspiruan bashkë.
Njëri prej tyre akuzohet për hakerimin e 63 mijë kamerave dhe prodhimin e 545 materialeve seksuale që i kishte shitur për 35 milionë uon (12, 235 dollarë) në vlerë asetesh virtuale.
Një tjetër kishte hakeruar 70 mijë kamera dhe shitur 648 video për 18 milionë uon asete virtuale.
Dy të dyshuarit janë përgjegjës për thuajse 62% të videove të postuara vitin e kaluar në një faqe interneti që shpërndante në mënyrë të paligjshme pamje të kamerave të hakeruara.
Policia tani po përpiqet të bllokojë dhe mbyllë faqen e internetit duke bashkëpunuar edhe me agjencitë e huaja që të hetohet operatori. Njëkohësisht janë arrestuar tre persona të dyshuar për blerjen dhe konsumimin e materialeve përmes faqes.
Autoritetet kanë shkuar pranë pikave ose kanë njoftuar viktimat e 58 vendndodhjeve të ndryshme duke i informuar mbi ngjarjen dhe duke i udhëzuar për të ndryshuar fjalëkalimet.
Ata po ndihmojnë edhe viktimat që të fshijnë dhe bllokojnë përmbajtjet, si dhe po identifikojnë të tjerë që mund të jenë prekur.